धनगढी-धनगढी–दिपायल द्रुतमार्ग अन्तरगत कैलालीको धनगढीदेखि खुटियासम्मको सडक खण्डका कालोपत्रे गरेको केही दिनमै खाल्डाखुल्डी परेको छ ।

धनगढी जिरो प्वाइन्ट पिपल चौतारादेखि स्याउलेमा पर्ने पूर्वपश्चिम राजमार्ग भन्दा केही उत्तरसम्म १३.४ किलोमिटर सडक खण्ड डबल विटुमिन सरफेर ट्रिटमेन्ट (डिविएरटी) प्रविधिबाट गत बैशाखमा कालोपत्रे गरिएको थियो । यस प्रविधिबाट बनाएको सडक सरफेस ड्रेसिङ प्रविधिबाट कालोपत्रे गरिएको सडक जस्तै चिल्लो हुने भएपनि धनगढीदेखि स्याउले खण्डमा खाल्डाखुल्डी असंख्य छन् ।

डिबिएसटी प्रविधि पुरानो र कमजोर सडक संरचना बन्ने खालको प्रविधि भएको हुनाले पिपल चौतारादेखि तीन किलो मिटर सडकमा खाल्डाखुल्डी देखिन थालेको छ । सडक कम गुणस्तरको बनाइएकोले निर्माणसंगै बर्खाको पानीले भत्किने सम्भावना बढेको स्थानीयले बताएका छन् । धनगढी उपमहानगरपालिका वडा नं. ११ का वडाध्यक्ष रुपबहादुर कुँवरले खडकमा खाल्डाखुल्डी पर्न देखिएको हुनाले आयोजना कार्यालयले सडक पास गर्नु भन्दा पहिले ल्याब टेष्ट गर्न आवश्यक रहेको बताए ।

द्रुत मार्गको दुई वटा खण्ड मात्रै हालसम्म कालोपत्रे सम्पन्न भएको छ । धनगढी-स्याउलेमा १३.४ किलोमिटर र डोटीको दिपायल–मेल्लेख सडक खण्ड अन्तरगत एयरपोर्टदेखि तिखासम्मको १५ किलोमिटर गरी जम्मा २८.३ किलोमिटर सडक सम्पन्न गरेको आयोजना कार्यालयले जनाएको छ ।

धनगढी स्याउले खण्डमा कालो पत्रेका काम सकिएर लेन छुट्याउने र जेब्रा क्रसिङ बनाउने काम पनि सकिएको छ । आयोजना कार्यालयबाट अन्तिम अनुगमन काम मात्रै बाँकी रहेको धनगढी–खुटिया–बिपीनगर–दिपायल–चैनपुर–उरैभन्ज्याङ सडक आयोजना कार्यालयले जनाएको छ । आयोजना कार्यालयका सूचना अधिकारी दिनेश रैखोलाले सम्पूर्ण काम सम्पन्न गर्न अझै एक हप्ता लाग्ने बताए ।

यस सडक खण्ड निर्माणका लागि खड्का कृष्ण, नारायणम्, बंगलामुखी जेभीले १६ करोड ३८ लाख ८५ हजार रुपैयाँमा ठेक्का सम्झौता गरिएकोमा १५ करोड ७३ लाख २९ हजार रुपैयाँमा निर्माण सम्पन्न भएको छ । २०७८ असार ७ गतेबाट शुरु भएको ठेक्काको म्याद थप सहित गत जेठ म्याद सकिएको सूचना अधिकार रैखोलाले बताए । उनले कुल लागत मध्ये अन्तिम किस्ता निर्माण कम्पनीलाई भुक्तानी गर्न बाँकी रहेको बताए ।

सम्पूर्ण काम सकिएपछि निर्माण कम्पनीले आयोजना कार्यालयलाई निर्मित सडक खण्ड हस्तान्तरण गर्ने उनले बताए । उनले निर्माण कम्पनीले सम्झौता अनुसार हस्तान्तरण भएको मितिले एक वर्षसम्म मर्मत सम्भारको समेत काम गर्ने बताए । उनले सोही अन्तरगत सडकमा देखिएको खाल्डाखुल्डी समेत पुरेर बराबर बनाउन लगाइने बताए । ‘निर्माणको क्रममा बिटुमिन र गिट्टी छुटेर खाल्डो परेको हो कि गिट्टी र बिटुमिन हुँदा पनि खाल्डो देखिएको हो । हामीले अनुगमन गर्छौं ।’ सूचना अधिकारी रैखोलाले भने, ‘निर्माण कम्पनीले पनि बर्षा सकिएपछि मर्मत गर्ने प्रतिबद्धता जनाएको छ । हस्तान्तरणपछिको एक वर्षसम्मको मर्मत खर्च निर्माण कम्पनीले नै बेहोर्छ । अन्य प्रविधिबाट बनाइएको सडक जस्तै यस प्रविधिबाट बनाइएको सडक पनि खाल्डाखुल्डी रहित हुन्छ ।’

द्रुतमार्गमा कैलालीतर्फ थप ७ किलोमिटर खण्ड कालोपत्रेका लागि ठेक्का लागि संरचना निर्माणको काम भइरहेको छ । १३.४ किलोमिटर खण्ड सकिएको ठाउँदेखि हातखोलीसम्मको सात किलोमिटर सडक कालोपत्रेका लागि सडक संरचना निर्माणको काम ५० प्रतिशत सम्पन्न भएको ईञ्जिनियर रैखोलाले बताए । कालिका वेदान्सी जेभीसंग २०७९ असार १६ गते १४ करोड २० लाखमा २४ महिनामा काम सक्ने गरी सम्झौता भएको थियो । गत असार १५ मा सो कम्पनीलाई दिएको म्याद सकिएपछि म्याद थपका लागि प्रक्रिया अगाडि बढाइएको छ । ईञ्जिनियर रैखोलाले सबबेस, बेस र कालोपत्रेको काम बाँकी रहेकाले थप समय माग गरिएको बताए ।

यसैगरी, द्रुतमार्ग अन्तरगत मेल्लेख सडकमा ९ किलोमिटर थप कालोपत्रेका लागि ठेक्का लगाइएको छ । सो सडक खण्डमा निर्माणको काम ७० प्रतिशत सम्पन्न भएको छ भने तीन किलोमिटरमा कालोपत्रे समेत गरिएको छ । यस सडक खण्ड निर्माणका लागि कालिका मेदान्त जेभीसंग १४ करोड २२ लाख ७२ हजारमा २०८२ साउन ४ गतेभित्रै निर्माण गर्ने सम्झौता भएको ईञ्जिनियर रैखोलाले बताए । द्रुतमार्गमा पर्ने आठ वटा खोला तथा नदीमा पुल निर्माणको लागि समेत ठेक्का गरिएको छ । २०७९ मा लगाइएका यी पुलहरुको काम ३० प्रतिशतसम्म सम्पन्न भएको छन् भने यी पुल निर्माण सम्पन्न गरिसक्नुपर्ने म्याद अब एक वर्ष मात्रै बाँकी रहेको आयोजना कार्यालयले जनाएको छ ।