धनगढी- पछिल्लो समय कैलाली मासु र अण्डा उत्पादनमा आत्मनिर्भर बन्दै गएको छ । बंगुर, कुखुरा, हाँस र बाख्राको व्यावसायिक पालन बढेसँगै मासु तथा अण्डा उत्पादनमा आत्मनिर्भर बन्दै गएको हो ।
जिल्लामा व्यावसायिक रुपमा फर्म दर्ता गरी बंगुर, कुखुरा, हाँस र बाख्रापालनतर्फ किसानको आकर्षण बढ्दै जान थालेको छ । भेटेरिनरी अस्पताल तथा पशु सेवा विज्ञ केन्द्रका सूचना अधिकारी कबिराज कठायतका अनुसार सरकारले पछिल्लो केही वर्ष यता व्यावसायिक रुपमा गाई भैँसीपालन गर्ने किसानलाई अनुदान दिने कार्यक्रम ल्याएपछि बर्सेनि मासु तथा अण्डा उत्पादनमा वृद्धि हुँदै आएको छ ।
कोरानाकालपछि विदेशमा रोजगारी गुमाएर स्वदेश फर्केकाहरुलाई प्रदेश सरकारले स्वदेशमै कृषि उद्यमी बन्न विभिन्न अनुदान कार्यक्रम ल्याएपछि पनि मासु तथा अण्डा उत्पादनमा वृद्धि हुँदै आएकोले आत्मनिर्भर बन्दै गएको उनले बताए ।
भेटेरिनरी अस्पताल तथा पशु सेवा विज्ञ केन्द्र धनगढीको तथ्याङ्क अनुसार कैलालीमा बाख्राका एक हजार ३०२, बंगुरका सात सय ९८,कुखुरा लेयर्स जातका एक सय ९५,कुखुरा बोइलर दुई हजार ४१० र कुखुरा स्थानीय नौं सय ९२ व्यावायिक रुपमा फर्म दर्ता गरी मासु तथा अण्डा उत्पादन गरिँदै आएको छ ।
जिल्लामा आर्थिक वर्ष २०७८/७९ मा १४ अजार नौं ५० मेट्रिक टन मासु उत्पादन आव २०७९/८० मा १८ हजार तीन सय ३८ मेट्रिक टन मासु उत्पादन भएको थियो । आव २०८०/८१ मा २३ हजार तीन सय ६७ मेट्रिक टन मासु उत्पादन भएको विज्ञ केन्द्रको तथ्याङ्कमा उल्लेख छ ।
यसै गरी आर्थिक वर्ष २०७८/७९ मा दुई हजार पाँच सय ५२ गोटा अण्डा उत्पादन आव २०७९/८० मा दुई हजार सात सय ११ गोटा अण्डा उत्पादन भएको थियो । आव २०८०–८१ मा तीन हजार दुई सय ११ गोटा अण्डा उत्पादन भएको विज्ञ केन्द्रको तथ्याङ्कमा उल्लेख छ ।
यसैगरी भेटेरिनरी अस्पताल तथा पशु सेवा विज्ञ केन्द्रले दिएको तथ्याङ्क अनुसार गत आव २०८०/८१ मा बार्षिक रुपमा कैलाली जिल्ला भएर पशुजन्य पदार्थ निकासी समेत बढ्न थालेको छ ।
जिल्ला भएर बार्षिक रुपमा सरदर एक अर्ब ६० करोड ६० लाखका भैंसी, तीन अर्ब ५० करोड ४० लाखका खसीबोका बाहिर निकासी हुने गरेको विज्ञ केन्द्रका सूचना अधिकारी कठायतले जानकारी दिए ।
यसैगरी गत आवमा बार्षिक रुपमा सरदर आठ करोडको छुर्पी, तीन करोड ६५ लाखको बटर घीउ र एक अर्ब ८३ करोड ९६ लाखको दुध जिल्ला भएर बाहिर निकासी भएको विज्ञ केन्द्रको तथ्यांकमा उल्लेख छ ।
