धनगढी । सुदुरपश्चिम प्रदेश सरकारले बजेट निर्माणको आधार सार्वजनिक गर्दै योजना छनौट र बजेट विनियोजनका सन्दर्भमा आवश्यक सल्लाह सुझाव दिन अपिल गरेको छ ।
मुख्यमन्त्री कमलबहादुर शाहले सोमबार पत्रकार सम्मेलन आयोजना गरी बजेट निर्माणका बाँकी प्रक्रियाहरु पुरा गर्न सम्मानित प्रदेश सभामा छलफलका लागि बजेट तथा कार्यक्रम पेश गर्ने बताएका छन् । उनले सबै प्रदेश सभा सदस्यको सहमतीमा प्रक्रियागत ढंगले प्रदेश सभाबाट बजेट निर्माणका बाँकी प्रक्रिया पुरा गर्ने बताए । उनले बजेट निर्माणका सन्दर्भमा प्रदेश सरकार सबै क्षेत्रका सम्बद्ध व्यक्ति, दल र नागरिक समाजसँग संबाद र छलफल गरिरहेको बताए ।
मुख्यमन्त्री शाहले यिनै आधारमा रही सबै मन्त्रालय र मातहतका निकायलाई वार्षिक विकास कार्यक्रममा बजेट विनियोजन गर्न निर्देशन दिइसकेको बताए । उनले सुदूरपश्चिम प्रदेश सरकारले भ्रष्टाचारलाई शुन्य सहनशिलतको नीति अवलम्वन गरी सुशासन, जनमुखी र जनउत्तरदायी तथा विकास र समृद्धि प्रति प्रतिवद्ध रहेको बताउँदै आफ्नो पदस्थापनको पहिलो दिन तीन वटा निर्णय गरेको बताए । उनले वित्तीय अनुशासन र सुशासन प्रबद्र्धन तथा भ्रष्टाचार न्यूनिकरणका लागि कार्यदल गठन गरी १५ दिनभित्र प्रतिवेदन पेश गर्ने, सुदूरपश्चिम प्रदेशका जनतालाई उपचारका लागि चाहिने रगत सरकारी अस्पतालहरुमा निःशुल्क व्यवस्था गर्ने र प्राकृतिक विपदका कारण हुने घटना–दुर्घटनाबाट पीडित व्यक्तिलाई राहत पुगोस भनेर प्रदेशवासी सबैको जोखिम दुर्घटना विमा गर्ने निर्णय गरेको बताए ।