धनगढी–कुनै बेला अस्तित्व समाप्त हुँदै गएको तौलाहाको सौन्दर्यकरण गरिएपछि गुल्जार बन्दै गएको छ ।
धनगढी उपमहानगरपालिकाले ताल घेरबार गरी सौन्दर्यकरण र गार्डेन बनाएर सञ्चालनको ठेक्का लगाएपछि घुमफिर गर्न आउने बढेका छन् । व्यस्त शहर धनगढीको छेउमै धनगढी गाउँमा रहेको दैनिक सयौं मानिसहरु घुम्न आउने गरेका छन् । तौलहा ताल गार्डेनका सञ्चालक अविनाश चौधरीले जनै पुर्णिमाको दिन मात्रै एक हजार दुई सय जनाले ताल घुम्न आएको बताए ।
धनगढी नगरपालिकाले वडा नम्बर–८ मा २०८० बैशाखमा दुई करोड ३४ लाख ८५ हजार रुपैयाँ खर्च गरेर तालको घेरबार, तालको वरपर गार्डेन, टिकट घर र शौचालय बनाएको थियो ।
धनगढी उपमहानगरपालिकाले २०८० असोज १२ गते वार्षिक पाँच लाख रुपैयाँमा तौलाहा ताल गार्डेन सञ्चालनको ठेक्का लगाएको हो । तौलहा ताल गार्डेनमा थप संरचना बनाउन बाँकी रहेको हुनाले २०८१ बैशाखदेखि लागू हुने गरी १० वर्षका लागि सञ्चालन गर्ने ठेक्का लिएको चौधरीले बताए । उनले ताल गार्डेनमा विरुवा रोप्ने, रेष्टुरेण्ट, भान्साघर, कटेज बनाउने काम अझैं जारी रहेको बताए ।
आन्तरिक पर्यटकहरुको रोजाईमा पर्न थालेको तौलाहा ताल गार्डेनमा रेष्टुरेष्ट, स्वीमिङ पुल, बोटिङ, रोटे पिंङ र सांस्कृतिक परिकारको व्यवस्था गरिन लागेको बताए । उनले थप ३१ कठ्ठा जमीन भाडामा लिएर पार्टी प्यालेस र स्वीमिङ पुल बनाउने तयारी भएको बताए । करिब १८ कठ्ठा जमीनमा फैलिएको प्राकृतिक तौलहा तालमा माछापालन गरी आगन्तुकलाई फिसिङको सुविधा उपलब्ध गराइने उनले बताए ।
तौलहा तालमा अहिले पनि माछा पालिएको चौधरीले बताए । उनले गत पुसमा १० हजार माछाको भुरा हालिएकोमा अहिले ३५० रुपैयाँ प्रति किलोका दरले जिउँदो माछा विक्री गरिरहेको बताए । उनले रेष्टुरेष्टमा स्वाद लिन फ्रेस माछाको विभिन्न परिकारहरु उपलब्ध रहेको बताए । उने यही भदौं १२ गते तौलहा ताल गार्डेनको औपचारिक उद्घाटन गर्ने तयारी रहेको बताए । तौलहा ताल गार्डेन प्रवेशको लागि प्रति व्यक्ति १० रुपैयाँ शुल्क निर्धारण गरिएको छ ।
