धनगढी– सत्ती–भजनी–धनगढी–डोकेबजार–बेलौरी–दैजी हुलाकी सडकअन्तर्गत सातवटा पुल निर्माण गर्न ठेक्का लगाइएकोमा दुईवटा पुलको मात्रै ठेक्का सम्पन्न भएको छ । हुलाकी सडक आयोजना कार्यालय धनगढीका अनुसार कैलालीमा तीनवटा र कञ्चनपुरमा चारवटा ठेक्का लगाइएकोमा कैलालीको कान्द्रा र कञ्चनपुरको सिमरीमा लगाइएको ठेक्कामात्रै सम्पन्न भएको छ ।
बाँकी पाँचवटा ठेक्काको काम अझै अलपत्र परेको छ । कुल ५४ करोड ७७ लाख रुपैयाँमा लगाइएको ठेक्कमा १९ करोड ९८ लाख रुपैयाँ निर्माण कम्पनीलाई भुक्तानी गरिसकिएको छ । तर पुल ठेक्काको भौतिक प्रगति ६९.५४ प्रतिशतमात्रै छ । कैलालीमा १२ करोड १३ लाख रुपैयाँमा तीन ठेक्का लगाइएकोमा आठ करोड ३२ लाख रुपैयाँ भुक्तानी भएको छ भने ठेक्काको प्रगति ६८.६१ प्रतिशत छ । कञ्चनपुरमा ४२ करोड ६३ लाख रुपैयाँमा चार ठेक्का सम्झौता भएकोमा ११ करोड ६५ लाख रुपैयाँ भुक्तानी भएको छ । तर भौतिक प्रगति २७.३४ प्रतिशतमात्रै भएको छ । हुलाकी सडकमा पुल बनाउन लगाइएको सात ठेक्कामध्ये दुई ठेक्काको काम सम्पन्न भएको भनिए पनि ती पुलको काम पूर्ण रूपमा सम्पन्न भएको छैन । भजनीमा पर्ने कान्द्रा खोलामा पुल निर्माण गर्न २०६८ जेठ ३१ गते लगाइएको ठेक्काको काम लामा शाल्पा शेर्पा विरुवा जेभीले गत असार मसान्तसम्म ९५.७५ प्रतिशतमात्रै सम्पन्न गरेको आयोजना कार्यालयले जनाएको छ ।
३९ करोड आठ लाख रुपैयाँमा लगाइएको ठेक्काबाट जेभीले ३८ करोड ९२ लाख ९७ हजार रुपैयाँ भुक्तानी लिएको छ तर पुल निर्माण थालेको १३ वर्षपछि पुल सञ्चालन भए पनि पुल निर्माणको सम्पूर्ण काम पूरा भएको छैन । यो ठेक्काको सम्पूर्ण म्याद गत असार १२ गते सकिएको छ । यसैगरी, कञ्चनपुरको सिमरी खेलामा २०८९ फागुन १९ गते पुल निर्माण गर्न मित्र बिल्डर्स महेन्द्रनगरलाई ठेक्का दिइएकोमा ९८.७५ प्रतिशत काम सम्पन्न भएको छ । यो पुल निर्माण काम लगभग सकिएको भए पनि पुल सुरक्षाको काम बाँकी रहेको आयोजना कार्यालयले जनाएको छ । यो ठेक्काको म्याद २०७९ फागुन ५ गते नै सकिएको छ ।
धनगढीको ओमशान्ति टोलमा वडा नं. १ र २ जोड्ने खोलामा २०७८ फागुन १९ गतेदेखि पुल बनाउन ठेक्का लगाइएकोमा मालिका निर्माण सेवाले ६२ प्रतिशतमात्रै काम सम्पन्न गरेको छ । यो ठेक्काको म्याद गत जेठ ३० गते सकिएको छ । सोही मितिमा धनगढी–८ मा पर्ने राधास्वामी खोलामा पुल निर्माण गर्न ठेक्का लगाइएकोमा ६० प्रतिशत भौतिक प्रगति भएको छ । यो ठेक्काको म्याद आगामी मंसिर ३ गतेसम्म छ । कञ्चनपुरको डोडा नदीमा पुल बनाउन २०७९ असार ५ गते ठेक्का लगाइएकोमा शान्ति निर्माण सेवाले १६ प्रतिशतमात्रै काम गरेको छ ।
टिसिएन खोलामा आरसिसी बक्स कल्भर्ट निर्माणका लागि २०८० वैशाख १७ गते ठेक्का लगाइएकोमा ८८.५० प्रतिशतमात्रै काम भएको छ । यो ठेक्काको म्याद गत असारमा सकिएको छ । कञ्चनपुरकै अम्खोइया खोलामा सिन आरसिसी बक्स कल्भर्ट निर्माणका लागि २०८० साउन १ गते निरज भौनेली श्रीयाज जेभीलाई ठेक्का दिइकोमा ६५ प्रतिशतमात्रै काम भएको छ । यो ठेक्काको म्याद आगामी असोज ३० गतेसम्म मात्रै छ । आयोजना कार्यालय धनगढका इन्जिनियर भक्तबहादुर कठायतले निर्माण कम्पनीले समयमा काम नगर्दा पुल र सडक निर्माणको कार्य प्रभावित भएको बताए । पछिल्लो दुई वर्षयता आयोजनामा बजेट अभावको समस्या आएको हुँदा पनि निर्माण कम्पनीले निर्माण कार्य सुस्त बनाएको उनले बताए । उनले सडक क्षेत्राधिकार विवादको कारणले गनि निर्माण कार्यमा ढिलाइ भएको बताए ।
