धनगढी- कैलालीको गौरीगंगा नगरपालिकाले नगरक्षेत्रमा २४ किलोमिटर सडक ग्राभेल गरेको छ । नगरपालिकाले गत आर्थिक वर्ष २०८०/८१ मा विभिन्न ग्रामीण सडक ग्राभेल गरेका हो ।
त्यस्तै सोही अवधिमा नगरक्षेत्रका ११ सडकमा करिब ८ किलोमिट सडक कालोपत्रे गरेको नगरपालिका इन्जिनियर रविचन्द्र जोशीले जानकारी दिए ।
वडा नं. १ स्थित गोप्पका देउथानदेखि मोहन्याल विद्युत सहकारीसम्म,वडा नंं.२ स्थित उदासी सडक,वडा नं. ३ स्थित वाशुदेव–भोजपुर–बेहडाबाबा,झिल बीच टोल सडक,कुचैनी विद्यालयदेखि तिनकुने चोक जाने सडक र वडा नं. ४ स्थित राजिपुर–खुरखुरिया–गदरिया सडक कालोपत्रे सम्पन्न भएको उनले बताए ।
उनकाअनुसार वडा नं. ५ स्थित सालघारी शिविरदेखि पूर्वी जिरायत हुँदै बालुवाटारसम्म,वडा नं. ६ स्थित मोयादेखि दक्षिण विद्युत घरसम्म,वडा नं. ७ स्थित कैलाशपुर दक्षिण सडक र वडा नं. ८ स्थित बेतनी चमारिपुर सडक कालोपत्रे गरेको छ ।
त्यस्तै वडा नं. ९ स्थित महादेव माविदेखि शंकर प्राविको गेटसम्म,वडा नं. १० स्थित चुल्लुराम चौधरीको घरदेखि भीमप्रसाद उप्रेतीको घरसम्म र वडा नं. ११ स्थित मसुरियादेखि डम्मारीपुरसम्म नालीसहित सडक कालोपत्रे गरिएको इन्जिनियर जोशीले जानकारी दिए ।
नगरपालिकाले सोही एक वर्षको अवधिमा विभिन्न नदीकटान क्षेत्रमा पाँच सय छ मिटर तटबन्धन निर्माण गरेको तथा छ वटा कल्भर्ट निर्माण गरेको जनाइएको छ ।
