धनगढी । सुदूरपश्चिम प्रदेशका मुख्यमन्त्री कमलबहादुर शाहले विविधताको बीचमा एकता र सद्भाव अभिवृद्धि गर्न माघी पर्वले उल्लेख्य योगदान पुर्याएको बताएका छ्न ।
माघे सङ्क्रान्ति, मकर सङ्क्रान्ति, माघी पर्व २०८१ को अवसरमा आज शुभकामना सन्देश जारी गर्दै यस्तो बताएका हुन ।
उनले शुभकामना सन्देशमा भनेका छन् ‘विशिष्ट मौलिक पर्वको रुपमा रहेको यस चाडमा गरिने स्नान, दान, पूजाअर्चना, मनोरन्जन, आपसी सद्भाव, प्रेम र मिष्ठान्न भोजन विशेष रुपमा लोकप्रिय रहेको छ । यस चाडले सुदूरपश्चिम र नेपाली समाजको समग्र विविधताको बीचमा एकता र सद्भाव अभिवृद्धि गर्न उल्लेख्य योगदान पुर्याएको मैले विश्वास लिएको छु ।’
उनले भने ‘धार्मिक एवं सांस्कृतिक सम्पदाको रुपमा रहेको यस पर्व सुदूरपश्चिम प्रदेशमा धुमधामसँग मनाउने प्रचलन रहि आएको छ। थारु समुदायमा माघी पर्वलाई नयाँ वर्षका रुपमा समेत मनाइन्छ ।’
‘विभिन्न समदायहरुद्वारा मनाउने माघे सङ्क्रान्ति, मकर सङ्क्रान्ति, माघी चाडको सुखद् अवसरमा स्वदेश तथा विदेशमा रहनुभएका सम्पूर्ण सुदूरपश्चिमेली र सम्पूर्ण नेपाली दिदीबहिनी तथा दाजुभाइहरुमा सुख, शान्ति र समृद्धिका लागि हार्दिक मंगलमय शुभकामना व्यक्त गर्दछु’ मुख्यमन्त्री शाहले शुभकामना सन्देशमा भनेका छ्न् ।
‘माघी पर्वले सम्पूर्ण नेपालीहरू बीच आपसी सद्भाव, सहिष्णुता र भ्रातृत्वको भावना अभिवृद्धि गर्दै राष्ट्रिय एकतालाई थप सुदृढ बनाउन मद्दत पुऱ्याउने विश्वासका साथ माघी पर्व २०८१ को हार्दिक शुभकामना व्यक्त गर्दछु’ शुभकामना सन्देशमा भनिएको छ ।
