धनगढी । नेपाली कांग्रेसका सभापति एवं पूर्वप्रधानमन्त्री शेरबहादुर देउवाले कांग्रेसमा अन्र्तरघात गर्ने रोग लागेको बताएका छन् ।

सोमबार धनगढीमा आयोजित नेपाली कांग्रेसको प्रथम सुदूरपश्चिम प्रदेश सम्मेलनमा बोल्दै उनले यस्तो बताएका हुन् । उनले भने ‘कांग्रेसमा एउटा रोग लागेको छ । अन्र्तरघात गर्ने रोग लागेको छ । यसलाई सदाका लागि निर्मूल पार्न आवश्यक छ ।’

उनले भने ‘पार्टीमा लडाइ हुन्छ । भोट हाल्दा खेरी एक भएर कांग्रेसमै भोट हाल्न सकेको भए पार्टी अगाडि बढ्ने थियो । यसको सुरुवात सुदूरपश्चिमबाटै गर्नुपर्छ ।’

संविधानमा भएको समानुपातिक व्यवस्थाले कुनै पनि दलको बहुमत आउने स्थिति नभएको बताउँदै कांग्रेस एक भएर लागे बहुमत ल्याउन सक्ने उनले बताए । उनले भने ‘पार्टीभित्रको आफ्नो मतभेद,असन्तुष्टि,प्रतिष्पर्धालाई एउटा पाटोमा राखेर एकमत भएर लाग्यौँ भने आगामी निर्वाचनमा हामीले बहुमत ल्याउन सक्छौँ ।’

समानुपातिक प्रतिनिधित्वको व्यवस्थाले कुनै पनि पार्टीले बहुमत ल्याउने अवस्था नभएका कारण गठबन्धन गर्नुपर्ने अवस्था आउने गरेकाे उनले बताए ।