धनगढी । अछामको मेल्लेख गाउँपालिका–४ घर भएका रोशन साउद स्ट्रबेरी खेतीमा जम्न थालेका छन् । उनले कैलालीको धनगढी उपमहानरपालिका–९ बङ्ग्राकटानमा बिगत दुई वर्षदेखि स्ट्रबेरी खेती गर्दै आएका छन् ।
उनले त्यहाँ करिब डेढ विगाहा जग्गामा भाडामा लिएका छन् । करिब १० कठ्ठामा स्ट्रबेरी खेती गरेको तथा बाँकी जग्गामा मेवा खेती गरेको उनी बताउँछन् । उनले यहाँ १२ हजार बोट स्ट्रबेरी लगाएको बताए । उमेरले २२ वर्षीय साउद कृषि प्राविधिक पनि हुन् । उनले आफूले कृषिमै भविष्य खोजिरहेको बताए ।
केही ठाउँमा जागिर गरेपनि चित्त नबुझेर कृषि क्षेत्रमै केही गर्नुपर्छ भन्ने उदेश्य लिएर यस क्षेत्रमा लागेको उनी बताउछन् । उनले भने ‘म कृषि प्राविधिक पढेको हुँ । मैले जागिर पनि गरेँ । तर जागिर भन्दा कृषि पेशा नै राम्रो लागेर यसमा आएको हुँ । यसबाट जागिरभन्दा राम्रो कमाइ पनि भइरहेको छ ।’
उनले प्लाष्टिक टनेलमा मल्चिङ प्रविधिको प्रयोग गरी स्ट्रबेरी खेती गरिएको र सिँचाइ सुविधा पु¥याउनका लागि थोपा सिँचाइको समेत व्यवस्था गरिएको बताए । उनले लगाएको स्ट्रबेरीले फल दिन थालेको छ । अहिले बजारमा लगेर स्ट्रबेरी बिक्री गर्न सुरु गरिएको उनले बताए । उनले भने ‘केही दिन यता स्ट्रबेरी बेच्न सुरु गरेको छु । दैनिक १० केजीसम्म बिक्री गरिहेको छु । प्रतिकिलो ८ सयमा बेचिरहेको छु ।’स्ट्रबेरी बजारमा सहजै बिक्री हुने उनी बताउँछन् । स्ट्रबेरी खेतीबाट आम्दानी राम्रै हुने भएपनि सुरुवाती चरणमा भएकोले अहिले आम्दानीको अनुमान नगरिएको उनले बताए ।
उनले भने ‘गत वर्ष त मैले परीक्षणका लागि यहाँ स्ट्रबेरी खेती गरेको थिए । यस वर्ष आम्दानी त भइरहेको छ । गर्मीले बिग्रिने भएकाले यति नै आम्दानी हुन्छ भन्ने अनुमान गरेको छैन् ।’
गर्मी ठाउँमा स्ट्रबेरी खेती गर्नु निकै चुनौतिपूर्ण रहेको उनी बताउँछन् । उनले भने ‘यो चिसो ठाउँमा हुने फल हो । यसलाई गर्मी ठाउँमा जोगाउन निकै मुस्किल हुन्छ । यहाँ मलाई चुनौति छ । गर्मीमा बिग्रिने डर हुन्छ । यसलाई शीतभण्डार चाहिन्छ ।’ उनले स्ट्रबेरीको बिरुवा इजिप्टबाट ल्याउने गरेको बताए । उनले आफ्नो अन्य जिल्लाहरुमा पनि स्ट्रबेरी खेती रहेको बताए ।
उनले करिब १७ लाख लगानीमा स्ट्रबेरी र मेवा खेती सुरु गरेको बताए । उनले २ हजार मेवाका बोट लगाइएको बताए । उनले मेवाबाट वार्षिक तीन लाख आम्दानी हुने गरेको बताए ।
