धनगढी । कैलालीको धनगढीस्थित नवजीवन सहकारी संस्था लिमिटेडले खाद्य उद्योग (राइस मिल) सञ्चालनमा ल्याएको छ ।
संस्थाले गोदावरी नगरपालिका–८ मझगाउँमा संस्थाको नाममा रहेको डेढ विगाहा जग्गामा (खाद्य उद्योग) राइस मिल सञ्चालनमा ल्याएको हो ।

शनिबार पत्रकार सम्मेलन गर्दै संस्थाले सञ्चालनमा ल्याएको खाद्य उद्योग प्रवद्र्धन तथा भावी योजनाका बारेमा जानकारी गराएको हो ।
पत्रकार सम्मेलनमा बोल्दै संस्थाका अध्यक्ष देवबहादुर बमले आव २०७५/७६ मा रिज्मको ३७ लाख र संस्थाको ६५ लाख गरी एक करोड २ लाखमा पाँच हजार क्विन्टल क्षमताको गोदामघर निर्माण गरिएको बताए ।

उनले एक करोड ५६ लाख मिलघर,राइसमिल प्लान्ट जडान,ट्रान्सफर्मर जडान,बाटो निर्माण लगायतका संरचना निर्माण गरिएको बताए ।
हाल संस्थाले कृषकबाट धान खरिद गरि आफ्नै ब्रान्डको चामल उत्पादनको लक्ष्य लिइ प्रतिघण्टा २ मेट्रिकटन क्षमताको राइसमिल प्लान्टसमेत जडान गरिसकिएको उनले बताए ।

अध्यक्ष बमले हालसम्म किसानसँग १६ हजार २८ क्विन्टल धान खरिद गरेको तथा १ हजार एक सय ८४ क्विन्टल धान कुटाइ गरेको र ६ सय ५१ क्विन्टल २५ किलो चामल उत्पादन गरिएको बताए ।

फोहर,वालुवा,माटो अलग गर्ने मेसिन रहेकाले एकदमै सफा र स्वच्छ चामल पाइने उनले बताए । शेयर सदस्यसहित आम नागरिकले स्वच्छ र अर्गानिक चामल उपभोग गर्न पाउने उनले बताए । सहकारीले उत्पादित चामल बिक्रि वितरण समेत सुरु गरेको छ । कैलाली,कञ्चनपुर र बर्दियामा रहेका १० वटा सेवाकेन्द्रमार्फत उत्पादित चामल बिक्री गरिने उनले बताए ।

हाल मोटा चामल(ग्रेडिङ चामल) र मसिनाे चामल उत्पादन गर्दै आएको उनले बताए । शेयस सदस्यबाट उचित मूल्यमा धान खरिद गरि विशेष छुटमा शेयर सदस्यहरुलाई १० वटै सेवा केन्द्रबाट चामल बिक्री गर्ने भावी योजना रहेको उनले बताए ।

पीठो,तेल तथा डेरी उद्योग उत्पादन तथा बिक्री गर्ने,राइसमिल रहेको क्षेत्रलाई नवजीवन औद्योगिक ग्रामका रुपमा विकास गर्दै लैजाने,व्यवस्थित गोदाम तथा भौतिक संरचना विकास गर्दै लैजाने तथा शेयर सदस्यलाई प्रत्यक्ष र अप्रत्यक्षरुपमा उत्पादनसँग जोडेर आर्थिक विकासमा टेवा पु¥याउने संस्थाको उदेश्य रहेको उनले बताए ।