धनगढी । सुदूरपश्चिम प्रदेशका मुख्यमन्त्री कमलबहादुर शाहले भ्रष्टाचारमा शून्य सहनशीलताका बिषयमा कसैसँग कुनै कम्प्रोमाइज नहुने बताएका छन ।
शुक्रबार कैलालीको घोडाघोडी तालक्षेत्रमा आयोजित कैलाली जिल्ला समन्वय समितिको नवौं जिल्ला सभा समारोह उद्घाटन गर्दै मुख्यमन्त्री शाहले सो कुरा बताएका हुन ।
“केही दिनअघि विवादित अडियो सार्वजनिक भयो र सम्बन्धित मन्त्रीले नैतिकताका आधारमा राजीनामा दिनुभयो,” मुख्यमन्त्री शाहले भने, “भ्रष्टाचारका सन्दर्भमा प्रदेश सरकार शून्य सहनशीलताको नीति लिएर अगाडी बढेको कुरा प्रष्ट हुन्छ ।”
“विवादित अडियो सम्बन्धित निकायले स्वतन्त्र र निष्पक्ष छानविनलाई अगाडि बढाउनु पर्दछ, यसमा मेरो व्यक्तिगत र प्रदेश सरकारको सहयोग रहन्छ,” उनले भने, “दोषी दण्डित हुनुपर्दछ, दोषीले उन्मूक्ति पाउनु हुँदैन ।”
अख्तियारले छानविन प्रकृया अगाडि बढाईसकेको र यसमा प्रदेश सरकारको सहयोग तथा समन्वय रहने मुख्यमन्त्री शाहले प्रतिवद्धता व्यक्त गरे । संसद सुचारु गर्न पटक–पटक सर्वदलिय बैठक बसेको बताउँदै मुख्यमन्त्री शाहले सदन अवरुद्ध गरेर समस्या समाधान नहुने बताए ।
उनले प्रतिपक्षसँग संवाद र सहकार्यबाट संसद सूचारु हुनेमा बिश्वास व्यक्त गरे ।
एक अर्को प्रशंगमा मुख्यमन्त्री शाहले देश संघीय संरचनामा गइसकेकोले संघीयताको बिकल्प नरहेको बताए । उनले भने “हामीले लोकतान्त्रिक गणतन्त्रात्मक व्यवस्था अंगिकार गरेका छौ, त्यो अनुसारको संविधान, संविधानतह निर्माण गरिएका नीति नियमलाई कार्यान्वयनको दिशामा लैजानुपर्छ ।”
