धनगढी । कञ्चनपुरमा भन्सार छली भारतबाट ल्याइएका जुत्तासहित प्रहरीले दुई जनालाई पक्राउ गरेको छ ।
कृष्णपुर नगरपालिका–५ स्थित पूर्व-पश्चिम महेन्द्र राजमार्गअन्तर्गत वनदेवी मन्दिर नजिक मंगलबार दिउँसो चेकजाँच गर्ने क्रममा भन्सार छली ल्याइएका सामानसहित दुई जनालाई पक्राउ गरिएको प्रहरीले जनाएको छ ।
सुदूरपश्चिम प्रदेश प्रहरी कार्यालय धनगढी र इलाका प्रहरी कार्यालय गुलरियाबाट संयुक्त रूपमा खटिएको प्रहरी टोलीले से १ च ३१९ नम्बरको महेन्द्रा पिकअप जिपमा भारतबाट भन्सार छली ल्याइएका अन्दाजी १३ लाख ३ हजार ६ सय रुपैयाँ बराबरका लेडिज जुत्ता बरामद गरेको हो ।
प्रहरीका अनुसार पक्राउ पर्नेमा बेलौरी नगरपालिका–४ रिछाका ३८ वर्षीय कुशल चौधरी र बेलौरी नगरपालिका–६ हात्तीबोझाका ४२ वर्षीय श्यामसिंह रावत रहेका छन् । चौधरी पिकअपका चालक र रावत सवारीधनी हुन् ।
त्यसैगरी, भीमदत्त नगरपालिका–६ ऐठपुरबाट पनि भन्सार छली भारतबाट ल्याइएका ८० हजार रुपैयाँ बराबरका विभिन्न किसिमका आयुर्वेदिक औषधिलगायत सामान बरामद गरिएको छ ।
बरामद सामान र पक्राउ परेका व्यक्तिमाथि आवश्यक अनुसन्धान तथा कानुनी प्रक्रिया अघि बढाइएको प्रहरीले जनाएको छ।
