धनगढी । जिल्ला प्रशासन कार्यालय कैलालीले सेवा प्रवाहको तयारी गर्न थालेको छ । जेन–जी आन्दोलनका क्रममा भएको आगजनी र तोडफोडपछि बन्द रहेको प्रशासनले आजबाट सेवा सुरु गर्ने तयारी थालेको हो ।
अत्यावश्यक सेवा प्रवाहका लागि तयारी गर्न थालिएको जिल्ला प्रशासन कार्यालय कैलालीका सूचना अधिकारी शिवराज जोशीले जानकारी दिए ।
उनले भने ‘हामी प्रयासमा छौँ । के कति सेवा सुरु गर्न सकिन्छ । इन्टरनेट जडानको प्रयास गरिरहेको छौँ । निजी क्षेत्रका दाताहरुले कम्प्युटर,प्रिन्टर लगायतका सामान दिने बताउनुभएको छ । हामीसँग त केही पनि बाँकी छैन् । सबै जलेर नष्ट भएको छ ।’
जेनजी आन्दोलनका क्रममा आगजनीका कारण कार्यालयका भवन, फर्निचर, कम्प्युटर र महत्त्वपूर्ण कागजातहरू जलेर नष्ट भएका थिए। हाललाई नागरिकता र विभिन्न सिफारिसलगायतका अत्यावश्यक सेवाहरू सुरु गर्ने गरि प्रयास भइरहेको सूचना अधिकारी जोशीले बताए । टेन्ट लगाएर वा आगजनीबाट बचेका कोठाहरुबाट सेवा प्रवाहको तयारी भइरहेका उनले बताए ।
