धनगढी । धनगढीमा रहेको हिलवर्ल्ड ईङ्गलिस बोर्डिङ स्कुलले जिल्ला प्रशासन कार्यालय कैलालीलाई आवश्यक सामग्रीहरु सहयोग गरेको छ । गत भदौ २४ गतेको जेनजी आन्दोलनका क्रममा प्रशासन कार्यालयमा आगजनी तथा तोडफोड भएपछि हिलवर्ल्ड स्कुलले सामग्रीहरु सहयोग गरेको हो ।

धनगढी उपमहानगरपालिका–१ मा अवस्थित हिलवर्ल्ड ईङ्गलिस बोर्डिङ स्कुलले आइतबार एक कार्यक्रममाका बीच विद्यालय व्यवस्थापन समितिका अध्यक्ष भोजबहादुर बम र प्रधानाध्यापक डिआर शर्माले प्रमुख जिल्ला अधिकारी कृष्णप्रसाद लम्साल र सहायक प्रमुख जिल्ला अधिकारी किरण जोशीलाई टेबल, कुर्सी,दराज लगायतका सामग्री हस्तान्तरण गरेका हुन् ।

सामाग्री हस्तान्तरण कार्यक्रममा विद्यालय व्यवस्थापन समितिका अध्यक्ष बमले हिलवर्ल्ड स्कूलले शैक्षिक गतिविधिसँगै सामाजिक र मानवीयकार्यमा पनि निरन्तर अग्रसरता देखाउँदै आएको उल्लेख बताए । उनले धनगढी उपमहानगरपालिका–१३ मा दृस्टि फाउण्डेशन स्थापना हुनुपुर्व नै हिलवर्ल्ड विद्यालय सामाजिक र मानवीय सेवामा सहयोग गर्ने पहिलो संस्था रहेको बताए । अध्यक्ष बमले यस्ता संकटका समयमा सबैले आपसी सहयोग र सहकार्यमा जुट्नुपर्ने आवश्यकता औंल्याउँदै एकता र सहयोगका लागि सामूहिक अपिल पनि गरेका थिए । जुनसुकै विपद्मा जहिले पनि हिलवर्ल्ड अगाडि उभिने गरेको उनले बताए ।

यस्तै सहयोग सामग्री हस्तान्तरण कार्यक्रमका अवसरमा प्रधानाध्यापक शर्माले हालैको जेनजी आन्दोलनका क्रममा भएको तोडफोड र आगजनीका कारण जिल्ला प्रशासन कार्यालयमा भौतिक संरचनात्मक क्षति पुगेको हुँदा सेवा प्रवाहमा समस्या आएको भन्दै विद्यालयको तर्फबाट मानवीय र सामाजिक उत्तरदायित्व स्वरूप आवश्यक सामग्री सहयोग गरिएको जानकारी दिए । उनले देशभर नै असहज परिस्थिति कायम रहँदा समेत प्रशासनजस्तो सेवा केन्द्रित संस्थाको दैनिक कामकाज सहज रुपमा सञ्चालन हुनु आवश्यक भएको उल्लेख गरे । शर्माले यस्ताखाले सहयोगले प्रशासनको नियमित सेवा सञ्चालनमा टेवा पुग्ने विश्वास व्यक्त गरे ।

कार्यक्रममा प्रमुख जिल्ला अधिकारी कृष्णप्रसाद लम्सालले विद्यालय व्यवस्थापन समिति बम, प्रधानाध्यापक शर्मा तथा विद्यालय परिवारलाई हार्दिक धन्यवाद व्यक्त गरे । उनले यस्तो कठिन परिस्थितिमा गरिएको सहयोगले प्रशासनलाई राहत मिलेको र समुदायसँगको सम्बन्ध अझ मजबुत भएको बताए । जेनजी आन्दोलनले गर्दा जिल्लामा प्रशासनको पुरानो भवन ध्वस्त भएको थियो । भने नयाँ भवनमा रहेका सबै सामग्रीहरु जलेर नस्ट भएका थिए । विभिन्न संघ संस्थाहरुको सहयोगमा प्रशासनले सहयोग नागरिकहरुको सेवा सुचारु गरिरहेको छ ।