धनगढी । कैलालीको गोदावरी नगरपालिका-१२ को नवनिर्मित वडा कार्यालय भवनको उद्घाटन गरिएको छ ।
सोमबार नगरप्रमुख वीरेन्द्र भट्टले नवनिर्मित वडा कार्यालय भवनको उद्घाटन गरेका हुन ।
उद्घाटन कार्यक्रममा बोल्दै उनले नगरपालिकाले २०७९ मै सबै वडाका भवन बनाउन खोजेको भएपनि नगरपालिकासँग आफ्नो जमिन नभएका कारण भवन निर्माणमा ढिलाइ भएको बताए ।
उनले वडा कार्यालय भवन निर्माणका लागि जग्गादाता पाएपछि यो भवन निर्माण सुरु भएको बताए ।
उनले वडा नम्बर १० र २ मा केही दिनमा वडा कार्यालय भवनको निर्माण सुरु गर्ने तयारी गरिएको जनाउँदै वडा न ३ मा भवन निर्माणाधीन अवस्थामा रहेको जानकारी दिए ।
त्यस्तै, वडा नम्बर ६ मा जग्गाको समस्याका कारण भवन बनाउन समस्या भएको उनले बताए । उनले निर्माण कम्पनीले निर्माण अवधि अगाडि काम सम्पन्न गरेकोमा धन्यावाद ज्ञापन गरे ।
वडाध्यक्ष भीमबहादुर खड्काले आजको दिन वडाका लागि खुसीको कुरा भएको बताउँदै भवन निर्माणका लागि निःशुल्क जग्गा उपलब्ध भएपछि भवन बनाउन सहज भएको बताए ।
उक्त भवन निर्माणका लागि उप्रेती बिल्डर्स एण्ड इन्जिनियर्स प्रालिसँग भ्याटसहित ६२ लाख ६५ हजार २८३ रुपैयाँमा ठेक्का सम्झौता गरिएको थियो । भवन निर्माणको म्याद असार मसान्तसम्म भएपनि निर्माण अवधि अघि नै काम सम्पन्न भएको हो ।
कार्यक्रममा भवन निर्माणका लागि निःशुल्क जग्गा दान गर्ने शेरबहादुर लुहार विक र प्रेमबहादुर बडैलालाई दोसल्ला उडाएर सम्मानित गरिएको थियो ।
