धनगढी । सुदूरपश्चिम प्रदेशमा एक महिनामा १२३ वटा सवारी दुर्घटना भएका छ्न ।
गत चैत महिनामा प्रदेशभरी भएका उक्त सवारी दुर्घटनाबाट २० जनाको मृत्यु भएको छ ।
दुर्घटनामा १५४ सवारी साधन संलग्न रहेको तथा दुर्घटनामा परी १८७ जना घाइते भएको सुदूरपश्चिम प्रदेश प्रहरी कार्यालयका प्रवक्ता प्रहरी वरिष्ठ उपरीक्षक पदमबहादुर बिष्टले जानकारी दिए।
उनका अनुसार सो अवधिमा २ हजार ८९६ सवारी साधन कारबाहीमा परेका छन् भने सो कारबाहीबाट २३ लाख ८१ हजार ५०० राजस्व सङ्कलन भएको छ ।
त्यसैगरि सो अवधिमा प्रदेशभरि विभिन्न अपराधका ३८३ वटा मुद्दा दर्ता भएका उनले जानकारी दिए । उनका अनुसार ज्यानसम्बन्धी ४७, आत्महत्याका ५५, चोरी सम्बन्धी ८, संगठित तथा आर्थिक अपराधका १०२, सामाजिक अपराधका ६३,महिला तथा बालबालिका सम्बन्धी अपराधका २९,सवारी ज्यान सम्बन्धी १९ र अन्य ६० वटा मुद्दा दर्ता भएका छन्।
त्यस्तैगरी सो एक महिनाको अवधिमा ५५ जनाले आत्महत्या गरेका छन् । ४८ जनाले झुन्डिएर र सात जनाले विषसेवन गरी आत्महत्या गरेको सुदूरपश्चिम प्रदेश प्रहरी कार्यालयले जनाएको छ ।
आत्महत्या गर्नेमा ३१ जना पुरुष, १३ जना महिला दुई जना बालक र नौ जना बालिका रहेको प्रहरीले जनाएको छ।
सो अवधिमा प्रदेशभरी लागुऔषधसम्बन्धि ६९ वटा मुद्दा दर्ता भएको प्रहरीले जनाएको छ । लागुऔषध सम्बन्धि मुद्दामा ८ महिला र १०७ पुरुष गरि ११५ जना पक्राउ परेका सुदूरपश्चिम प्रदेश प्रहरी कार्यालयले जनाएको छ ।
त्यस्तै, ११४ ग्राम ५५८ मिलिग्राम चरेश,१६३ ग्राम ७८० मिलिग्राम खैरो हिरोईन र १ ग्राम २८० मिलिग्राम गाँजा बरामद गरिएको जनाइएको छ ।
