धनगढी । नेपाली कम्युनिष्ट पार्टीको ७७औँ स्थापना दिवस तथा लेनिनको जयन्तीका अवसरमा नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ले सम्पूर्ण शहीदहरूप्रति श्रद्धाञ्जली अर्पण गर्दै शुभकामना व्यक्त गरेका छन्।
उनले आज एक सन्देश जारी गर्दै न्याय, स्वतन्त्रता र समानताका लागि जीवन उत्सर्ग गर्ने शहीदहरूको योगदानलाई स्मरण गर्दै घाइते, अपाङ्ग तथा शहीद परिवारप्रति उच्च सम्मान व्यक्त गरेका छन्।
वि.सं. २००६ साल वैशाख ९ गते स्थापना भएको नेपाली कम्युनिष्ट पार्टीले सामन्तवाद र साम्राज्यवादविरुद्ध जनताको जनवादी सत्ता स्थापना गर्ने लक्ष्य अघि सारेको सन्देशमा उल्लेख छ ।
सोही आन्दोलनको निरन्तरताबाट मुलुक आज सङ्घीय लोकतान्त्रिक गणतन्त्रसम्म आइपुगेको प्रचण्डले बताएका छन्।
तर वर्तमान अवस्थामा पनि शोषण, दमन र विभेदका नयाँ रूपहरू कायम रहेको उल्लेख गर्दै उनले जनताको पूर्ण व्यवस्था स्थापना हुन अझै बाँकी रहेको बताएका छन्। यस्तो अवस्थामा समाजमा विभेद रहिरहँदासम्म कम्युनिष्ट आन्दोलनको आवश्यकता कायम रहने उनको भनाइ छ।
प्रचण्डले विश्व परिवेशमा साम्राज्यवाद झन् आक्रामक बन्दै गएको र राष्ट्रिय स्वाधीनता तथा आत्मनिर्णयको अधिकारमाथि चुनौती बढिरहेको सन्दर्भमा लेनिनका विचार अझ सान्दर्भिक बनेको बताएका छन्।
उनले सबै वामपन्थी तथा कम्युनिष्ट शक्तिहरूबीच एकता आजको आवश्यकता भएको उल्लेख गर्दै समाजवाद र साम्यवादतर्फ अग्रसर हुन आह्वान गरेका छन्। साथै, नेपाली कम्युनिष्ट आन्दोलनको पुनर्गठन, शान्ति सम्झौता र लोकतान्त्रिक गणतन्त्रको रक्षा तथा विकासका लागि व्यापक मोर्चाबन्दी आवश्यक रहेकोमा जोड दिएका छन्।
अन्त्यमा उनले लेनिनप्रति सम्मान व्यक्त गर्दै वैचारिक एकता र आन्दोलनको पुनर्गठनका लागि सबैमा आह्वान गरेका छन्।
