धनगढी । आगामी जेठ ९ गते हुने नवजीवन सहकारी संस्था लिमिटेडको निर्वाचनमा सञ्चालक समितिका अध्यक्ष पदका उम्मेदवार गोपालराज पाठकले आफ्नो प्यानल घोषणा गरेका छन् ।
आज धनगढीमा पत्रकार सम्मेलन गर्दै पाठकले आफ्नो चुनावी प्यानल घोषणा गरेका हुन् । अध्यक्षका उम्मेदवार पाठकले दुई कार्यकाल नवजीवन सहकारीको सञ्चालक समितिमा रहेर काम गरिसकेका छन् ।
पाठकको प्यानलबाट सञ्चालक समितिको उपाध्यक्षमा उत्तम जोशी,सञ्चालक समिति सदस्यहरुमा कोपिला कुँवर,गणेश बम,जगतराम चौधरी, जयराज जोशी,ठोमनाथ ढकाल (टी.एन) ,भरतराज जोशी र लक्ष्मीराज पन्त उम्मेदवार रहेका छन् ।
त्यस्तै,पाठक प्यानलबाट लेखा तथा सुपरीवेक्षण समितिको संयोजकमा गणेशप्रसाद जोशी,सदस्यमा खेमराज पाठक र गणेशप्रसाद उपाध्यायको उम्मेदवारी रहेको जनाइएको छ । पत्रकार सम्मेलनमा बोल्दै अध्यक्षका उम्मेदवार पाठकले संस्थामा सुशासन कायम गरि विकृति हटाउन शून्य सहनशीलता अपनाइने बताए ।
उनले संस्थामा रहेको तरलतालाई न्यूनीकरण गर्दै सहकारी मापदण्ड भित्र सीमित गरिने प्रयास गरिने,सदस्यहरुले पाइरेको सुविधाहरुको क्षेत्रविस्तर गरिदै लगिने तथा संस्थामा रहेका कर्मचारीहरूलाई प्रविधिमैत्री बनाउँदै लगिने बताए ।
अध्यक्षका उम्मेदवार पाठक प्यानलले आफ्नो ८ बुँदे प्रतिवद्धता समेत सार्वजनिक गरेको छ ।
यस्ता छन् पाठक प्यानलका प्रतिवद्धता
१. संस्थागत सुशासन : संस्थाको ख्याती र गौरव कायम राख्न हरेक प्रकारका विकृति हटाउन शून्य सहनशीलता अपनाइनेछ । संस्थामा गरिने नयाँ कार्यक्रमलाई प्रभावकारी बनाउन शेयर सदस्यहरुमध्येबाट सम्बन्धित विषयको जानकारहरु, सञ्चालक कर्मचारी सम्मिलित योजना तर्जुमा उपसमिति गठन गरि लागु गरिनेछ ।
२. लगानी तथा असुली : संस्थामा रहेको तरलतालाई न्यूनीकरण गर्दै सहकारी मापदण्ड भित्र सीमित गरिने प्रयास गरिनेछ, जसका लागि लगानीका नयाँ क्षेत्रको पहिचान र व्याजदरमा समयसापेक्ष परिवर्तन गर्दै उत्पादनमुखी क्षेत्रमा लगानी विस्तार गरिनेछ । साथै निस्क्रिय कर्जाको असुनीका लागि विशेष कार्यदलको गठन गरी असुली कार्यलाई प्रभावकारी बनाइनेछ ।
३. सदस्य हित : संस्थामा भएका कार्यहरूको जानकारी गराउन र शेयर सदस्यहरुको गुनासो तथा सुझाव ग्रहण गरी संस्थाका कार्यक्रमलाई प्रभावकारी बनाउनका लागि सूचना अधिकारी सहितको प्रणाली स्थापना गरिनेछ । सदस्यहरुले पाइरहनु भएको सुविधाहरुको क्षेत्रविस्तर गरिदै लगिनेछ ।
४. उत्पादन : संस्थाले सकार गरेका जमिनलाई संस्थाको सम्पत्तिको रुपमा ग्रहण गरी सम्भाव्यताका आधारमा उत्पादन क्षेत्रमा प्रयोग गरिनेछ र किसान शेयर सदस्य रहेको क्षेत्रहरूमा लघुवित्त कार्यक्रमलाई विस्तार गरिनेछ । साथै मजगाउँमा रहेको नवजीवन खाद्य उद्योगलाई विस्तार गरिनेछ ।
५. जनशक्ति विकास : संस्थामा रहेका कर्मचारीहरूलाई प्रविधिमैत्री बनाउँदै लगिनेछ ।
६. भौतिक विकास : संस्थाको जोशीपुर सेवा केन्द्रमा आवश्यक पर्ने भवन निर्माण र चौमाला सेवा केन्द्रको कार्यालय भवन निर्माणका लागि जग्गा खरिद गरिनेछ ।
७. प्रविधि र स्रोत साधन : संस्थाको कार्यलाई प्रभावकारी बनाउन समय सापेक्ष आधुनिक सफ्टवेयरको प्रयोग गर्दै अनलाइन कारोवारलाई प्रोत्साहन गर्दै मसलन्दको खर्चमा कटौती गरिनेछ ।
८. कार्यकालको परिणाम (हाम्रो लक्ष्य) : संस्थाको सेवा प्रविधिमैत्री बनाउदै कारोबार र सुशासनको हिसावले देशभरिमा पहिलो स्थानमा पुर्याइने छ ।
