टंक कुंवर
धनगढी । कैलालीको गौरीगंगा नगरपालिकाले करार खेती प्रवद्र्धन कार्यक्रम लागु गरेपछि कृषकहरुलाई ठूलो राहत भएको छ । गौरीगंगा नगरपालिका वडा नं. १ मंगलपुरमा सो कार्यक्रम लागु भएको छ ।
नगरपालिकाले स्थानीय विकास जोशीको ५ विगाह जमिन वार्षिक एक लाख ८३ हजारमा पाँच वर्षका लागि भाडामा लिई कृषक समुहमार्फत कृषकलाई तरकारी र फलफूल खेती गर्न उपलब्ध गराएपछि कृषकहरुलाई आयआर्जन गर्न ठूलो राहत भएको हो ।

नगरपालिकाले स्थानीय जागृती पशु फलफूल तथा तरकारी कृषक समुहलाई सो जग्गा २०८१ फागुनदेखि तरकारी र फलफूल खेती गर्न उपलब्ध गराएको गौरीगंगा नगरपालिकाका नगर उपप्रमुख भोजबहादुर बमले निशाना न्युजलाई जानकारी दिए ।

अहिले सो जमिनमा समुहका पाँच जना कृषकहरुले तरकारी तथा फलफुल उत्पादन गरी आत्मनिर्भर बनिरहेको उनको भनाइ छ । समुहसंग पहिलो बर्ष भाडा लगेनौ, उनले भने,‘दोस्रो बर्षमा १० प्रतिशत मात्र भाडा लिएका हौं ।’ नगरपालिकाले समुहसंग तेस्रो बर्ष २५ प्रतिशत ,चौथो बर्ष ४० प्रतिशत र पाँचौ बर्षमा ५० प्रतिशत भाडा लिने गरी सम्झौता गरेको उनले बताए ।

यो कार्यक्रम सफल भए नगरपालिकाको अन्य क्षेत्रमा पनि लागु गरिने नगर उपप्रमुख वमको भनाइ छ । नगरपालिकाले जमिन सहुलियत दरमा भाडामा दिएपछि तरकारी खती गरिरहेको समुहका सचिव राजेश बुढाले बताए । अहिले वेमौसी तरकारी फर्सी,लौका, भिन्टी, बोडी, भान्टा,खुर्सानी, बसन्ते मकै उत्पादन गर्दै आएका छौ उनले भने, सिजनलमा काउली बन्दा ब्रोकाउली,सिमी गाजर,मुला धनिया,खुर्सानी ,भान्टा, आलु, मटर, र गाजर उत्पादन गरेका र्छौ ।

उनले बेमौसमी तरकारी उत्पादनबाट ७५ हजार र सिजनेवल तरकारीबाट ४ लाख ५० हजारको बिक्री गरेको बताए । सबै खर्च कटाएर एक लाख ५० हजार बचत भएको उनको भनाई छ । मटरमात्र एक लाख ६५ हजारको बिक्री भएको उनले बताए । उनले समूहमा आवद्ध किसान आत्मनिर्भर भएको बताउँदै नगरपािलकालाई धेरे धेरै धन्यबाद दिए । हामीले उत्पादन गरेको तरकारी स्थानीय बजारमा पुगाउन नसकेको बताउँदै उनले यो बर्ष अलि बढी उत्पादन गरी सुदुरपश्चिमका अन्य बजार सम्म पुरयाउने लक्ष्य रहेको बताए ।

समुहका सबै कृषक सन्तुष्ट नै छन् उनले भने गर्न सके स्वदेशमै आत्मनिर्भ वन्न सकिन्छ । आलुको २०, गाजरको ४०,मटरको ३० खुर्सानीको ५०,सिमीको प्रति केजी १८० रुपैयामा बिक्री भईरहेको उनले बताए । त्यस्तै काउलीको ८०, व्रो काउलीको प्रतिकेजी ११० रुपैयामा बिक्री हुने गरेको छ ।
गौरीगंगा नगरपालिकाका कृषि प्राविधिक विनोद चौधरीले आफ्नो जमिन नभएका कृषकहरुलाई आत्मनिर्भर बनाउने उदेश्यले यो कार्यक्रम शुरु गरिएको बताए ।