धनगढी । प्रदेश निर्वाचन कार्यालय धनगढीको वार्षीक समीक्षा तथा सरोकारवालाहरुसँग अन्तरक्रिया कार्यक्रमका आज सम्पन्न भएको छ ।
कार्यक्रममा प्रदेश निर्वाचन कार्यालयका प्रमुख प्रेमराज भट्टले गत आर्थिक वर्ष २०८२८३ मा सम्पादन गरेका कामको प्रस्तुतिकरण गरेका थिए ।

उनले निर्वाचन कार्यालयले गत आवमा राष्ट्रियसभा सदस्य निर्वाचन–२०८२ सफलतापूर्वक सम्पन्न गरेको,प्रतिनिधिसभा सदस्य निर्वाचन–२०८२ को सम्पूर्ण व्यवस्थापन,समन्वय तथा सञ्चालन गरि प्रभावकारी रुपमा सम्पन्न गरेको जानकारी दिए ।

त्यस्तै, २८ हजार ५७३ जना नयाँ मतदाता दर्ता गरिएकामा राष्ट्रिय परिचयपत्र प्रणालीमार्फत २१ हजार ८५७ जना,कार्यालयमा जैविक विवरण संकलनमार्फत ६ हजार ७१६ जना मतदाता दर्ता गरिएको जानकारी दिए ।

विवरण सच्याउने,मतदाता सार्ने तथा मृत्युका कारण नाम हटाउने लगायत ३ हजार ६६५ वटा मतदाता नामावली अद्यावधिक कार्य सम्पन्न गरिएको उनले बताए ।

अनलाईन मतदाता नामावली प्रणाली सम्बन्धी वडास्तरीय सहजीकरण,निर्वाचन तथा मतदाता शिक्षा,विशेष मतदाता शिक्षा कार्यक्रम,विद्यालय स्तरीय लोकतन्त्र,निर्वाचन तथा मतदाता शिक्षालगायतका कार्यक्रम गरिएको उनले जानकारी दिए ।

निर्वाचन सामाग्रीसम्बन्धी सहजीकरण,राजनीतिक दल तथा अन्य सरोकारवालासँग समन्वयलगायतका कार्य गरिएको उनले बताए ।
त्यस्तै,उनले गत फागुन २१ गते भएको प्रतिनिधसभा सदस्यको निर्वाचनमा प्रदेशका १६ वटै निर्वाचन क्षेत्रमा २४ वटा दलले भाग लिएको बताए । जसमा दलकातर्फबाट १७८ जना र २८ जना स्वतन्त्र उम्मेदवार गरि २०६ जनाले उम्मेदवार रहेका उनले बताए । त्यसमध्ये १८८ जना पुरुष र १८ जना महिला उम्मेदवार रहेका उनले जानकारी दिए ।

कार्यक्रममा सहभागीहरुले दलहरुले महिलालाई प्रत्यक्षतर्फ उम्मेदवार न्यून बनाउने गरेका कारण महिलाको प्रतिनिधित्व कम हुने गरेको बताउँदै आगामी निर्वाचनमा महिला उम्मेदवार बढाउनु पर्नेमा जोड दिए ।

कार्यक्रममा बोल्दै नेपाली कम्युनिष्ट पार्टीका सुदूरपश्चिम प्रदेश कमिटी सदस्य कृष्णप्रसाद चौधरीले महिला उम्मेदवार बन्दा खर्च गर्न सक्दैनन्,चुनाव जित्दैनन् भन्ने गलत सोचका कारण महिलालाई दलहरुले टिकट नदिने बताउँदै आगामी दिनमा हरेक तहका निर्वाचनमा महिला उम्मेदवारलाई बढाउनु पर्ने बताए ।

त्यस्तै,कार्यक्रममा बोल्दै नेकपा एमालेका धनगढी उपमहानगर कमिटी अध्यक्ष अम्बिका बिष्टले महिलाहरु पनि राज्य सञ्चालनमा सक्षम भइसकेका बताउँदै महिलाहरुलाई दलहरुले उम्मेदवार बनाउनु पर्नेमा जोड दिइन् ।

कैलालीका प्रमुख जिल्ला अधिकारी हीरालाल रेग्मीको अध्यक्षतामा भएको कार्यक्रममा विभिन्न राजनीतिक दलका प्रतिनिधि,सरोकारवाला तथा सञ्चारकर्मीको सहभागिता रहेको थियो ।