धनगढी  । होटल एसोसिएशन नेपाल (हान) सुदूरपश्चिम प्रदेशको पहिलो अधिवेशनले रुवस होटलका सञ्चालक प्रकाश चन्द्र भट्टको अध्यक्षतामा नयाँ प्रदेश समिति सर्वसम्मत चयन गरेको छ ।
धनगढीस्थित रुवस होटलमा शनिबार सम्पन्न अधिवेशनबाट भट्ट अध्यक्षमा चयन भएका हुन् । अधिवेशनले निवर्तमान अध्यक्षमा दिनेश राज भण्डारीलाई राखेको छ । त्यस्तै वरिष्ठ उपाध्यक्षमा कञ्चनपुरको गंगोत्री होटलका सञ्चालक जगदिश चन्द्र भट्ट र उपाध्यक्षमा सिद्धार्थ होटल कञ्चनरपुरका सञ्चालक परमानन्द भण्डारी चयन भएका छन् ।
नवनिर्वाचित समितिको महासचिवमा थर्क बहादुर शाह चयन भएका छन् । सदस्यहरूमा मान सिह साउद, पदम विक्रम सिंह, नरेन्द्र खड्का, भुवन सिंह भण्डारी, चन्द्रप्रकाश ओली, बसन्ता भण्डारी, शारदा शाह, पशुपती कुँवर, नवराज जोशी, ज्ञानेन्द्र गुप्ता र दिपेश शाह चयन भएका छन् ।
प्रथम साधारण सभाको प्रमुख अथिति तथा सुदूरपश्चिम प्रदेशका मुख्यमन्त्री खगराज भट्टले एक कार्यक्रमका बीच उद्घाटन गरेका थिए । कार्यक्रममा हानका राष्ट्रिय अध्यक्ष विनायक शाह विशिष्ट अथिति रहेका थिए भने कार्यक्रमको अध्यक्षता दिनेश राज भण्डारीले गरेका थिए ।
सुदूरपश्चिममा होटल तथा पर्यटन व्यवसायको विकास, व्यवसायीका समस्या समाधान, पर्यटन प्रवद्र्धन तथा प्रदेशको पर्यटन क्षेत्रलाई थप व्यवस्थित र व्यावसायिक बनाउने उद्देश्यले एसोसिएशनले काम गर्ने अपेक्षा गरिएको छ ।
अधिवेशनले प्रदेशमा रहेका होटल तथा पर्यटन व्यवसायीबीच सहकार्य र समन्वय बढाउँदै पर्यटन व्यवसायलाई प्रदेशको आर्थिक विकाससँग जोड्ने विषयमा समेत जोड दिएको छ । सुदूरपश्चिम प्राकृतिक, धार्मिक तथा सांस्कृतिक पर्यटनका दृष्टिले महत्वपूर्ण सम्भावना बोकेको प्रदेश भए पनि आवश्यक पूर्वाधार, प्रचारप्रसार तथा व्यवसायमैत्री वातावरणको अभावमा अपेक्षाकृत लाभ लिन नसकेको व्यवसायीहरूको भनाइ छ।
नवनिर्वाचित समितिले होटल व्यवसायीका साझा समस्या पहिचान गरी सम्बन्धित सरकारी निकायसँग समन्वय गर्ने, पर्यटन पूर्वाधार विकासमा सहकार्य गर्ने तथा सुदूरपश्चिमलाई राष्ट्रिय तथा अन्तर्राष्ट्रिय पर्यटकको आकर्षक गन्तव्यका रूपमा विकास गर्न पहल गर्ने बताइएको छ ।
पहिलो अधिवेशनबाट सर्वसम्मत रूपमा नयाँ नेतृत्व चयन भएपछि प्रदेशका होटल तथा पर्यटन व्यवसायीहरूबीच थप एकता र सहकार्यको वातावरण बनेको व्यवसायीहरूले बताएका छन् ।