धनगढी- सुदूरपश्चिम प्रदेश सरकारले आगामी आर्थिक बर्षको बजेटमा अपाङ्गता भएका ब्यक्तिहरुलाई उपेक्षा गरेको भन्दै आन्दोलित भएका छन्। उनीहरु अहिले सुदूरपश्चिम प्रदेशको राजधानी धनगढीमा अनशनमा बसिरहेका छन्। एक हप्ताअघि नै पत्रकार सम्मेलनमार्फत आन्दोलन घोषणा गरेर उनीहरु सडकमा रहँदा पनि सुदूरपश्चिम प्रदेश सरकारले भने कुनै चासो देखाएको छैन।
प्रदेश सरकारले आगामी वर्षका लागि सार्वजनिक गरेको नीति तथा कार्यक्रममा अपाङ्गता भएका नागरीकलाई होच्याउने र अपमानित खालका शब्द प्रयोग गरेको र बजेटमा समावेशीरुपमा अपाङ्गता भएकालाई नसमेटेको भन्दै उनीहरुले मुख्यमन्त्री तथा मन्त्रिपरिषद कार्यालय, प्रदेशसभा सचिवालय र सामाजिक विकास मन्त्रालयमा ज्ञापनपत्र समेत बुझाएका छन्।
ज्ञापनपत्र बुझाएर ध्यानाकर्षण गराउँदा पनि माग पूरा हुने संकेत नदेखिएपछि सडक आन्दोलन गर्न बाध्य भएको अपाङ्गता अधिकार प्रबर्दधन संर्घष समितिका संयोजक भीमवहादुर शाहले बताए। माग सम्बोधन गरीदिन मुख्यमन्त्री तथा मन्त्रिपरिषद्को कार्यालयमा जाँदा गेटमा रोकेपछि धनगढी बजारमा र्याली गरेर मंगलवारदेखि सडकमा रिले अनशन बसेको उनले बताए।
शुक्रबार अर्थात यही १५ गतेपछि शसक्तरुपमा आमरण अनशनमा बस्ने उनको भनाइ छ। सडक प्रदर्शनपछि अनशनमा बसेको तेस्रो दिनसम्म सरकारले केही चाँसो नदेखाएको भन्दै राष्ट्रिय अपाङ्ग महासंघ सुदूरपश्चिम प्रदेश अध्यक्ष मानवहादुर साउदले सुनवाइ नहुँदासम्म आन्दोलन जारी रहने बताए।
आफुहरुले उठाएका मागबारे जानकारी गराउदै राष्ट्रिय अपाङ्ग महासंघ सुदूरपश्चिम प्रदेशका सचिव एवं संघर्ष समिति सदस्य नन्दराज भट्टले अपाङ्गताका क्षेत्रमा कार्यरत सबै संघसंस्थाको संस्थागत विकास र सवलिकरणका लागि केही बजेट माग गरेको बताए। यस्तै, आवश्यक साहायक सामाग्री, सरकारी अस्पतालमा सांकेतिक दोभाषेको व्यबस्था लगायतका माग रहेको उनको भनाइ छ।
