धनगढी- धनगढी उपमहानगरपालिका वडा नम्बर १ लक्ष्मीनगरका स्थानीयबासी आन्दोलित बनेका छन् । धनगढी उपमहानगरपालिकाले नाली अतिक्रमण गरि बनाएका संरचना भत्काउन आनाकानी गरेको भन्दै स्थानीयबासी आन्दोलित बनेका हुन् । आइतबार वडामा टोल भेला बोलाई उनीहरुले दबाबमुलक कार्यक्रम अघि बढाउने प्रतिक्रिया दिए ।
उपमहानगरपालिकालाई पटक–पटक अतिक्रमित संरचना हटाउन भनेर आग्रह गर्दा समेत नगर प्रमुख गोपालबहादुर हमाल र वडा नम्बर १ का वडा अध्यक्ष सन्तोष मुडभरीले संरचना भत्काउनमा सहयोग नगरेको स्थानीयबासी सविता आचार्यले बताइन् । उनले नाली निर्माणका लागि सबैभन्दा पहिले आफनो घर भत्काए पनि अझै केही घरले संरचना नभत्काउदा नाली निर्माण हुन नसकेको बताइन् ।
‘ड्वानको समस्याबाट टोललाई बचाउन मैले भौतिक संरचना हटाएको थिए’ उनले भनिन –‘टोलका अन्य घरहरु पनि आफै संरचना हटाउन तयार हुँदा समेत नगर प्रमुखले कहिले लगानी अभाव, कहिले डोजर नभएको त कहिले मुख्य सडक विस्तारलाई प्राथमिकता दिएको प्रतिक्रिया दिएर पञ्छिन खोजेको छ ।’
सोही वस्तीका स्थानीय तथा निवर्तमान वडा सदस्य सुवास चन्द ठकुरीले वडाले संरचना भत्काउन पटक–पटक सूचना जारी गर्दा समेत अतिक्रमित नालीका संरचना हटाउन असहयोग गरिरहेको बताए ।
उनले भने –‘वडा अध्यक्ष भोलिदेखि संरचना हट्छ भनेर आश्वासन बाँड्छन तर, व्यवहारमा काम गर्न सकिरहेका छैनन् । वर्षातको मौसम शुरु भइसक्दासमेत नाली निर्माण नहुँदा टोलनै डुवानमा पर्ने समस्या बढेको छ ।’
धनगढी उपमहानगरपालिकाले श्रीरामको घरदेखि मिलसम्म नाली निर्माण गर्ने कार्यक्रम बनाएको थियो । तर, अतिक्रमित संरचना नहट्दा उपमहानगरपालिकाले सो योजनाका लागि विनियोजन गरेको पाँच लाख रकम फ्रिज गएको थियो ।
सो नाली निर्माणका क्रममा टोलका १५ घरहरुको भौतिक संरचना भत्काउनुपर्ने प्रतिवेदन तयार भएको थियो । झण्डै चार सय १५ मिटर लामो नालीमा घरहरु बनेको हुँदा टोलनै डुवानमा परिरहेको उनको भनाइ थियो ।
उनी भन्छन् –‘नगर प्रमुखसंग पटक–पटक गुनासो राखिरहेका छौं । अहिले नगर प्रमुखले गैरजिम्मेवारी अभिव्यक्ति र टोलको समस्या समाधानमा ध्यान दिनुभएको छैन् । उल्टै टोलबासी लडाउने काम गरिरहनु भएको छ ।’
नालीमाथि बनेका घर देखाउँदै उनले भने –नालामा बनाएको घर भत्काउने काम भएन । उपमहानगरको नीति डुवान भएपछि पानी निकाल्ने हो की डुवान हुन नदिन अतिक्रमण हटाउने हो ।’
