ढल्केवर- आफ्नै सौतेनी आमालाई कुटपिट गरी हत्या गरेको आरोपमा धनुषा प्रहरीले एक जनालाई पक्राउ गरेको छ। पक्राउ पर्नेमा भारतको वेतिया जिल्ला नरकटियागंज थाना केयुनिया घर भई धनुषाको गणेशमान चारनाथ नगरपालिका-४ पथलैयास्थित अशोक जैसवालको घर भाडामा लिएर बस्दै आएका १९ वर्षीय प्रेम भगत रहेको प्रहरीले जनाएको छ।

खानामा बासी भात दिएको भन्दै उनले ३९ वर्षीया आमा मिरा देवी भगतलाई कुटपिट गरी हत्या गरेको प्रहरी समक्ष स्वीकारेको धनुषाका प्रहरी प्रवक्ता प्रहरी नायव उपरीक्षक वेदप्रसाद गौतमले जानकारी दिए। उनका अनुसार आइतबार दिउँसो मिरा बस्दै आएको घरमा टाउकोमा चोट लागेको तथा शरीरका विभिन्न भाग जलेको अवस्थामा उनी मृत फेला परेको हो।

अनुसन्धानका क्रममा प्रेमलाई नियन्त्रणमा लिई अनुसन्धान गर्दै जाँदा उनले आमाको हत्या गरेको स्वीकारेको प्रहरीले जनाएको छ। ‘आमासँग खाना माग्दा बासी भात खान दिएको र आफू बासी भात खान्न बरु होटेलमा गएर खाना खान्छु भन्दा आमाले आफूलाई बुवाको समेत नाम जोडेर अनेक प्रकारको अपशब्द प्रयोग गरी गाली गलौज गर्दा आवेशमा आएर आमालाई धक्का दिँदा आमा भुइँमा लडेको भन्ने प्रेमले बयान दिएको छ’, प्रहरी नायव उपरीक्षक गौतमले भने।

प्रेमको बयानलाई उद्धृत गर्दै गौतमले भने ‘आमाले आफूलाई त्यहाँ रहेको काठको चिर्पटले हान्न खोज्दा आफूले सो चिर्पट खोसेर आमाको पिठ्युँमा हान्दा टाउकोमा लागेर सोही ठाउँमा आमाको मृत्यु भयो।’ मिराको मृत्यु भए लगत्तै घटनालाई ढाकछोप गर्न प्रेमले उनको शरीरमा आगो लगाई जलाएको प्रहरीले जनाएको छ।