महेन्द्रनगर- शुक्लाफाँटा नगरपालिकाले बहुवर्षे गौरवका योजनालाई उच्च प्राथमिकता राखेको जनाएको छ। चक्रपथ निर्माण, कभर्ड हल तथा खेल मैदान निर्माण, खानेपानी योजना, कोल्ड स्टोर निर्माण, दीर्घकालीन परियोजना निर्माण गरिरहेको छ।

यस अन्तर्गत नगरपालिकाभर डुबान क्षेत्रको पहिचान तथा बाढीको पानी निकासका लागि विस्तृत योजना, नगर यातायात गुरुयोजना र सहरी योजना तथा भवन निर्माण मापदण्ड २०८० बनाएको छ।

पालिकाले एसियाली विकास बैङ्क अन्तर्गत ४.७ किलोमिटर पक्की सडक रहेको छ। यससँगै चार वटा वडा कार्यालय र नगरपालिकाको मुख्य प्रशासनिक भवन निर्माण गरेको छ। नगरपालिकाले नगर चक्रपथ, खानेपानी योजना लक्ष्मीपुर, नगरधस्तरीय कभर्ड हल निर्माणलगायतका योजनाको काम सुरु गरेको हो।

बहुवर्षे योजनालाई प्राथमिकताका साथ अगाडि बढाइएको नगरपालिकाका इन्जिनियर दीपक धामीले बताए। उनका अनुसार नगरपालिकाकै लगानीमा नगर चक्रपथ निर्माणको काम भइरहेको छ। नगर चक्रपथ अन्तर्गत वडा नं. १२, १, २ र ३ सम्म २.६७ किलोमिटर सडक स्तरोन्नतिको काम भइरहेको छ।

चक्रपथ सडकको चौडाइ नौ मिटर हुनेछ। योसँगै नगरपालिकाका सबै वडाका प्रमुख सडक पिच गर्ने काम भइरहेको छ। २.६७ किलोमिटर चक्रपथ स्तरोन्नति र प्रत्येक वडाका एउटा मुख्य सडक (७.६७ किलोमिटर) पिच गर्ने काम भइरहेको छ। जसको जिम्मा एड्भान्चर राजधानी नागार्जुन जेभी धनगढीले पाएको छ।

एक करोड ४४ लाख सात हजार ५६१ रुपियाँ लगानीमा सबै वडाका एउटा मुख्य सडक पिच र चक्रपथ (वडा नं. १२, १, २ र ३) निर्माण २०८० साल मङ्सिर ३० गतेभित्र सक्ने गरी सम्झौता भएको छ। चक्रपथ निर्माणका लागि नगरपालिकाले आगामी आर्थिक वर्षको बजेटमा एक करोड ४० लाख विनियोजन गरेको छ। शुक्लाफाँटामा १२ वडा छन्। नगर चक्रपथ सबै वडासँग जोडिने छ।

नगरपालिकाको वडा नम्बर १० स्थित खुलामञ्चको दक्षिण खेलमैदानमा ५१०.६८ वर्गमिटर क्षेत्रफलमा नगर स्तरीय कभर्ड हल निर्माण हुँदै छ। कभर्ड हलको लम्बाइ २८.४५ मिटर र चौडाइ १७.९५ मिटर रहेको छ। दुई करोड ६६ लाख ४९ हजार ५५४ रुपियाँको लगानीमा निर्माण हुने कभर्ड हलको काम २०८१ साल असारमा सक्ने गरी सम्झौता भएको पालिकाले जनाएको छ। कभर्ड हल निर्माणका लागि ९० लाख रुपियाँ बजेट विनियोजन गरिएको छ।

त्यस्तै नगर गौरवको योजना अन्तर्गत वडा नम्बर २ मा खानेपानी योजना निर्माण भइरहेको छ। निर्माणाधीन खानेपानी योजनाले वडा नम्बर २ र ३ मा सहज हुने छ। छ करोड ८० हजार ४१४ रुपियाँ लगानीमा निर्माण भइरहेको खानेपानी योजनाको काम २०८१ साल असारमा सम्पन्न गरिने जनाइएको छ। नगरपालिकाले आगामी आर्थिक वर्षमा नगर स्तरीय बसपार्क, कोल्ड स्टोर निर्माणको कामसमेत सुरु गरेको छ। कोल्ड स्टोर तथा बसपार्क निर्माणका लागि चाररचार लाख रुपियाँ बजेट विनियोजन गरेको छ।