धनगढी- कैलालीमा एक सय ६४ वटा विद्यालय भवन निर्माण सम्पन्न भएका छन् । जिल्लास्थित सामाजिक विकास कार्यालयले तीन वर्षको अवधिमा ती भवन निर्माण सम्पन्न गरेको हो ।

कार्यालयले सो अवधिमा जिल्लाका विभिन्न सामुदायिक विद्यालयहरुमा एक सय २६ वट दुई कोठे र ३८ वटा चार कोठे भवन निर्माण गरेको सामाजिक विकास कार्यालयका प्रमुख गगनदेव भट्टले जानकारी दिए ।

उनका अनुसार प्रदेश सरकारको लगानीमा आव २०७७÷०७८ मा ३२ वटा दुई कोठे र ३१ वटा चार कोठे भवन निर्माण गरिएको हो । प्रति भवन दुईकोठे १८ लाख र चार कोठेको लागत ३८ लाख रहेको उनले बताए । त्यस्तै आवमा ०७८÷०७९ मा प्रति भवन १८ लाख लागतमा ३७ वटा दुई कोठ भवन निर्माण गरिएको उनले जानकारी दिए । कार्यालयले आव ०७९÷०८० मा ५७ वटा दुईकोठे र सात वटा चार कोठे भवन निर्माण गरेको कार्यालय प्रमुख भट्टले जानकारी दिए । दुईकोठे भवनको लागत १९ लाखमा र चारकोठे भवनका लागत ३८ लाख रहेको जनाइएको छ ।

चालु आव २०८०÷८१ मा १० वटा दुई कोठे विद्यालय भवन निर्माणधिन अवस्थामा रहेको सामाजिक विकास कार्यालयले जनाएको छ । ‘जिल्लाका विभिन्न सामुदायिक विद्यालयमा निर्माणाधिन अवस्थामा रहेका भवन निर्माणको अन्तिम चरणमा रहेका छन् ।’ कार्यालय प्रमुख भट्टले भने ‘आगामी बैशाख भित्रै सम्पन्न हुने कार्यालयको अपेक्षा छ ।’ प्रति भवनको लागत २० लाख रहेको उनले जानकारी दिए ।