धनगढी- कैलालीमा पनि २१ औँ राष्ट्रिय धान दिवस तथा रोपाइँ महोत्सव मनाइएको छ । आज कृषि ज्ञान केन्द्र कैलालीको आयोजनामा धनगढी उपमहानगरपालिका–११ घोडसुवामा रोपाइँ महोत्सव मनाइएको हो ।
कार्यक्रमा बोल्दै जिल्ला समन्वय समिति कैलालीका प्रमुख खगराज भुसालले धान दिवसलाई उत्पादनसँग जोडेर लैजानु पर्ने धारणा राखे । उनले भने ‘हामीले कृृषिलाई प्रविधीमैत्री बनाउँदै उत्पादन बढाउनमा ध्यान दिनुपर्ने बेला आएको छ ।’ उनले कृषि कार्यकै लागि विदेश जान लाइनमा बस्ने प्रवृति रहेको उल्लेख गर्दै उनले सबैलाई आफ्नै देशमा कृषि कार्यमा लाग्न आग्रह गरे ।
उनले कृषिमा उत्पादन बढाउनका लागि तीनै तहका सरकारले ध्यान दिनु पर्नेमा जोड दिए । युवा पुस्ताले कृषि पेसालाई सम्मानित पेसाका रुपमा लिन पनि उनले आग्रह गरे । कृषि ज्ञान केन्द्रका प्रमुख हरिप्रसाद पनेरुको अध्यक्षतामा भएको कार्यक्रममा कैलालीका प्रमुख जिल्ला अधिकारी धर्मेन्द्रकुमार मिश्र, धनगढी उपमहानगरपालिका–११का वडाअध्यक्ष रुपबहादुर कुँवर,वडा नं. ६ का वडाअध्यक्ष भागीराम चौधरीलगायतको उपस्थिति रहेको थियो । साथै किसानको उल्लेख्य सहभागिता रहेको थियो ।
कार्यक्रम अपि हिमाल एग्रो एण्ड लाभइस्टक कम्पनी प्रालिको सहयोगमा सम्पन्न भएको थियो । रोपाइँ कार्यक्रमा मेसिनको प्रयोगले समेत धान रोपिएको थियो ।
