धनगढी । सुदूरपश्चिमका आन्तरिक मामिला तथा कानुनमन्त्री हीरा सार्कीले मुक्त हलियाको उचित पुनःस्थापना आवश्यक भएको बताएका छन् ।

राष्ट्रिय मुक्त हलिया समाज महासंघ नेपालको आइतबार धनगढीमा आयोजित १३औं वार्षिक साधारण सभाको उद्घाटन समारोहमा बोल्दै उनले यस्तो बताएका हुन् ।

उनले भने ‘बस्न समस्या हुने ठाउँमा मुक्त हलियालाई जग्गा दिइएको छ । जहाँ अहिले उहाँहरु बस्नु भएको छैन् ।’ उचित र रोजगारी सिर्जना हुन सक्ने ठाउँमा जग्गा दिनुपर्ने उनले बताए ।

उनले स्थिर सरकार नहुँदा मुक्त हलियाको पुनःस्थापनाका काममा ढिलाइ भएको बताए । उनले पटक–पटक सरकार फेरिँदा पुनःस्थापनाका काम ढिला भएको बताए ।

मन्त्री सार्कीले वास्तविक हलिया पुनःस्थापना हुनबाट छुटेको बताउँदै पुनःस्थापना छुट मुक्त हलियालाई समेट्नु पर्ने बताए । उनले भने ‘मैले मुक्त हलियाका समस्या समाधानका लागि विभिन्न समयमा पहल गर्दै आएको छु । अझै सक्दो सहयोग गर्ने प्रतिवद्धता व्यक्त गर्दछु ।’

प्रदेशसभा सदस्य तथा पूर्वमन्त्री शिवराज भट्टले मुक्त हलियाका समस्या छिटोभन्दा छिटो समाधान गर्नुपर्ने बताए । उनले भने ‘लामो समयदेखि यो समस्या रहँदै आएको छ । जति ढिलो भयो त्यति जटिलता बढ्दै जान्छ । छिट्टै मुक्त हलियाका समस्या समाधान गर्नुपर्छ ।

त्यस्तै प्रदेशसभा सदस्य तथा पूर्वमन्त्री लक्ष्मी विकले मुक्त हलियाको समस्या राष्ट्रिय समस्या भएका कारण यसलाई प्रदेश सरकारले पनि गम्भीरताका साथ लिनुपर्ने बताइन् । उनले सरकारले सुशासन,विकास र सामाजिक न्यायमा ध्यान दिनुपर्ने बताइन् । उनले भनिन् ‘यो प्रदेशलाई छुवाछूत मुक्त बनाउन,रोजगारीको सिर्जना गर्न सबै पार्टीले मिलेर काम गर्न आवश्यक छ ।’

उनले माओवादी केन्द्रले गरेको जनयुद्धबाट यो व्यवस्था आएको बताउँदै पछि पारिएका वर्गका केही अधिकारहरु संविधानमा लेखिएको बताइन् । उनले भनिन् ‘हाम्रो पार्टीले गर्दा नै आज संविधानमा समानुपातिक,समावेशी,धर्म निरपेक्षता जस्ता कुरा लेखिएका हुन् ।’ उनले मुक्त हलियाको पक्षमा माओवादी केन्द्र सधै लागेको बताइन् ।

प्रदेशसभा सदस्य तथा पूर्वमन्त्री रामेश्वर चौधरीले मुक्त हलिया,मुक्त कमैया,मुक्त कम्लरीका समस्या समाधानका लागि प्रदेश सरकारले थोरै मात्रै बजेट छुट्याएको बताए । उनले भने ‘हामी सरकारमा हुँदा १० करोड बजेट छुट्याएका थियौँ । नयाँ सरकार आएपछि त्यसलाई घटाएर एक करोड ५० लाख मात्रै विनियोजन गरेको छ ।’ उनले यसको समस्या समाधानका लागि सबैको दावव आवश्यक भएको बताए ।

कार्यक्रममा इन्सकेका सुदूरपश्चिम प्रदेश कार्यालय प्रमुख खडकराज जोशी,मानव अधिकार आयोग सुदूरपश्चिम प्रदेश कार्यालय प्रतिनिधि झंकर रावल,अधिवक्ता बालाराम भट्टराई,मुक्त कमैया समाज सुदूरपश्चिम प्रदेश अध्यक्ष चन्द्रप्रकाश चौधरीलगायतले मन्तव्य व्यक्त गरेका थिए । महासंघका केन्द्रीय अध्यक्ष ईश्वर सुनारको अध्यक्षतामा भएको साधारण सभामा महासंघका उपाध्यक्ष पर्वत सुनारले स्वागत मन्तव्य राखेका थिए भने सञ्चालन सचिव डवल विकले गरेका थिए ।