काठमाडौँ । नेकपा एकीकृत समाजवादी पार्टीका अध्यक्ष माधव नेपाल र नेकपा एकता राष्ट्रिय अभियानका अध्यक्ष वामदेवबिचको छलफल सकारात्मक भएको नेताहरूले दाबी गरेका छन् ।
नेपालसँगको छलफलपछि सञ्चारकर्मीलाई प्रतिक्रिया दिँदै गौतमले एकताका लागि दुई नेता एकजुट भएको दाबी गरे । एकताबारे केही दिनमै सञ्चारमाध्यमलाई जानकारी दिने बताए ।
नेपालसँग निर्णायक छलफल गर्न बिहीबार एकीकृत समाजवादीको केन्द्रीय कार्यालय आलोक नगर पुगेका गौतम निकै उत्साहित देखिएका छन् ।
यस्तै माधव र गौतमबिच भएको छलफल भएको एकीकृत समाजवादीका उपाध्यक्ष जगन्नाथ खतिवडाले पनि दाबी गरेका छन् । आजको बैठकमा सङ्गठनात्मक भन्दा पनि बढी राजनीति, सैद्धान्तिक पक्षबिच छलफल भएको खतिवडाले जानकारी दिए ।
‘आजको छलफल उच्चस्तरीय सकारात्मक छ । अब केही दिनभित्र एकताको अन्तिम आकार दिइने समझदारी भएको छ । आजको बैठकमा सङ्गठनात्मकभन्दा पनि नीतिगत, राजनीतिक, सैद्धान्तिक छलफल भयो’, रातोपाटीसँग उनले भने, ‘वामदेवजीले प्रत्यक्ष निर्वाचित राष्ट्रपति र पूर्ण समानुपातिक निर्वाचित प्रणालीमा जानुपर्छ भन्ने प्रस्ताव राख्नुभएको छ ।
उहाँ वामदेव को प्रस्तावलाई सकारात्मक रूपमा लिँदै हाम्रा अध्यक्षले यस विषयमा थप छलफल गर्दै जाउँला भन्नुभएको छ । विचारको विश्लेषण गर्ने, राम्रा नराम्रा पक्षमा बहस जारी राख्ने सहमति भएको छ । यही स्पिरिडमा गए एकता प्रक्रिया १५ दिनभित्र सम्पन्न हुन्छ ।’
वामदेवलाई पार्टीभित्र तेस्रो मर्यादामा दिनेगरी सहमति भइसकेको भन्दै बाँकी नेताको व्यवस्थापनका लागि अर्को बैठकमा छलफल गर्ने खतिवडाले जानकारी दिए । यसअघि पुस १५ गते नेपाल र गौतमबिच छलफल भएको थियो ।
