धनगढी । नेपाली कांग्रेस गौरीगंगा नगर कार्यसमिति सचिव तथा युवा नेता एवं हेमा श्री फाउन्डेसन नेपालका कार्यबाहक अध्यक्ष हेमन्तराज जोशी (बाजे)ले विद्यार्थीहरुलाई न्यानो टोपी वितरण गरेका छन् ।

उनले अछामको साँफेबगर नगरपालिका–१३,बावलास्थित राष्ट्रिय माध्यामिक विद्यालयमा अध्ययनरत कक्षा १ देखि ६ कक्षा सम्मका १ सय ५० जना विद्यार्थीहरुलाई न्यानो टोपी वितरण कार्य गरेका हुन् ।

बावलाका प्रधानपञ्च,शैक्षिक व्यक्तित्व एवं सो विद्यालयमा विसं. २०३० देखि २०३२ सालसम्म प्रअ रहेका स्वर्गीय विष्णुप्रसाद जोशी को ४५ औँ स्मृतिमा न्यानो टोपी वितरण गरिएको जनाइएको छ ।

विद्यालय अभिभावक संघका अध्यक्ष दयानाथ जोशीको सभापतित्वमा सम्पन्न कार्यक्रमका प्रमुख अतिथि वडा नं–१३ का वडाध्यक्ष रुपबहादुर कुँवर र विशिष्ट अतिथि स्वर्गीय विष्णुप्रसाद जोशीका छोरा तथा हेमा श्री फाउन्डेसन नेपालका कार्यबाहक अध्यक्ष हेमन्तराज जोशी (बाजे) रहेका थिए ।

त्यसैगरी अन्य अतिथिहरुमा वडा सदस्य बलबहादुर साउँद,पूर्व विद्यालय व्यवस्थापन समिति अध्यक्ष टेक बटाला,समाजसेवी दानसिं कुँवर,टंक बटाला लगायत शिक्षक शिक्षिका र विद्यार्थीहरुको उपस्थिति रहेको थियो। विद्यालयमा आयोजित सो कार्यक्रममा उपस्थित वक्ताहरुले स्व.विष्णुप्रसाद जोशीले समाज र शिक्षा क्षेत्रमा खेलेको भूमिका र योगदान महत्वपूर्ण भएको चर्चा गरेका थिए।

उक्त कार्यक्रममा हेमन्तराज जोशी (बाजे)ले आफूमा सहयोगी भावना रहेको र असहायको सहयोगमा सदैव तत्पर रहने हुँदा बालबालिकाहरुलाई सहयोग गरे स्व. बुवाप्रति सच्चा सम्मान र आदर हुने तथा आत्माले समेत शान्ति मिल्ने उद्देश्यले यो कार्य गरेको बताए।
कार्यक्रममा विद्यालयका सहायक प्रअ रमानन्द जोशीले स्वागत मन्तव्य राखेका थिए भने कार्यक्रमको सञ्चालन प्रअ तिलक कुँवरले गरेका थिए ।