धनगढी । कैलालीको धनगढी उपमहानगरपालिका–५ शिवनगरस्थित चैतन्य पाठशालामा प्रथम चैतन्य विद्यार्थी महोत्सव शनिबार सम्पन्न भएको छ ।
चैतन्य पाठशालाको आयोजनामा गत पुस २७ गतेदेखि सुरु भएको प्रथम चैतन्य विद्यार्थी महोत्सव आज आठौँ दिनमा सम्पन्न भएको हो ।
चैतन्य पाठशालाले विगतका वर्षदेखि नै आयोजना गर्दै आइरहेको स्टिमफेयर वार्षिक खेलकुद सप्ताहलाई यो वर्ष विन्टर क्याम्प रमाइलो मेलालाई जोडेर संयुक्त रुपमा आयोजना गरेको थियो ।
पाठशालाका अध्यक्ष गणेशप्रसाद जोशीको अध्यक्षता तथा वरिष्ठ साहित्यकार,महाकाव्यकार डा. नवराज लम्सालको प्रमुख आतिथ्यमा भएको प्रथम चैतन्य विद्यार्थी महोत्सवको समापन समारोहमा विश्वकै कान्छी भागवत वाचिका अनुराधा पाण्डेयको उपस्थिति रहेको थियो । कार्यक्रममा बोल्दै डा. लम्सालले पहिला मानिस अनुशासित र व्यवहारिक बन्न जरुरी रहेको बताए । केवल विद्यार्थीले विद्यालयको सर्टिफिकेट मात्रै प्रप्त गर्ने नभएर व्यक्तित्व निर्माण, ज्ञानको व्यवहारिक र भविक्ष्यको राम्रो व्यक्ति बन्न आवश्यक रहेको उनले बताए । विद्यालयमा विद्यार्थी र शिक्षक शिक्षिकाको मात्रै भूमिका नभएर अभिभावकले पनि आफ्ना नानिबाबुहरुको हरेक समयमा हेरबिचार गरिराख्नुपर्ने उनले बताए ।
भागवत वाचिका पाण्डेयले सबैले विद्याको अध्ययन गरेर मात्रै मानिस अनुशासित, धार्मीक तथा वौद्यिक व्यक्ति बन्ने बताइन् । मातापिता, गुरुको आश्रय तथा संस्कारको आज्ञा पालन गरेर शिक्षा आर्जन गर्न सकिने र मानिसलाई सुख यसैबाट प्राप्त गर्न सकिने उनको भनाइ थियो ।
पाठशालाका प्रधानाध्यापक कटकबहादुर सिंहले चैतन्य विद्यार्थी महोत्सवमा विद्यार्थी तथा सहभागीहरूले विभिन्न ज्ञान,सीप,मनोरञ्जन,विद्यार्थीहरुको वैज्ञानिक आविस्कार,अन्वेषण,परियोजना, खेलकुद लगायत बहस तथा शैक्षिक बहस जस्ता जीवन उपयोगी उद्यमबारे ज्ञान हासिल गरेको बताए ।
शिक्षा र संस्कारको संगम, वेद र विज्ञानको संयोजन, प्रकृति र संस्कृतिको सम्मानका लागि चैतन्य पाठशालाको शैक्षिक अवधारणा अघि बढिरहेको र पाठशालाले विद्यार्थीहरूको चौतर्फी विकासका लागि उक्त महोत्सव गरिएको उनको भनाइ छ ।
कार्यक्रममा विश्वकै कान्छी भगवत वाचिका वालविदुषि देवी अनुराधा पाण्डेको उपस्थिति र प्रवचन, महाकाव्यकार, मदन पुरस्कार विजेता डा. नवराज लम्सालको प्रेरक चैतन्य संवाद गरिएको थियो । यस्तै स्टिम प्रोजेक्ट अन्तर्गत प्लेनको परिक्षण उडान, वैज्ञानिक आविस्कारको प्रदर्शन, पुरस्कार वितरण र सम्मान एवं सांस्कृतिक प्रस्तुति गरिएको थियो ।
