धनगढी । कैलालीको धनगढीस्थित चैतन्य पाठशालाले ११५ औं अन्तर्राष्ट्रिय नारी दिवस मनाएको छ । “सबै महिला र छोरीहरूका अधिकार समानता र सशक्तीकरणको हकदार“ भन्ने मूल नाराका साथ ११५ औँ अन्तर्राष्ट्रिय नारी दिवसको अवसरमा चैतन्य आमा अभिभावकहरूका लागि शुभकामना आदान–प्रदान कार्यक्रम आयोजना गरिएको थियो ।

महिला सशक्तीकरण, नारी नेतृत्व, परिवारमा महिलाहरूको भूमिका र समसामयिक सामाजिक परिवेशका विषयमा गहन छलफल गर्न आयोजित कार्यक्रम आयोजना गरिएको थियो। कार्यक्रममा धनगढी उपमहानगरपालिकाकी पूर्वउपप्रमुख तथा समाजसेवी सुशीला मिश्र प्रमुख वक्ताका रूपमा उपस्थित थिइन्। कार्यक्रममा चैतन्य पाठशालाका शिक्षक, विद्यार्थी, अभिभावक, महिला अभिभावक, पत्रकार, बुद्धिजीवी तथा विभिन्न सामाजिक सङ्घसंस्था प्रतिनिधिहरूको उल्लेखनीय उपस्थिति रहेको थियो।

कार्यक्रममा प्रमुख वक्ता पूर्वउपप्रमुख मिश्रले महिला सशक्तीकरण, नेतृत्व विकास, सामाजिक र आर्थिक स्वावलम्बन जस्ता विषयमा विशेष प्रकाश पार्दै भनिन्, “महिलाहरू समाजको मेरुदण्ड हुन्। उनीहरूको सहभागिता बिना कुनै पनि समाजको विकास सम्भव छैन। इतिहासमा हेर्दा पनि नारीहरू नेतृत्वदायी भूमिकामा रहेका छन्। तर आज पनि महिलाहरू अनेकौँ सामाजिक कुरीति, भेदभाव र हिंसाका सिकार छन्। हामीले अब महिलाहरूलाई अधिकार र अवसर प्रदान गर्दै समानताको यात्रामा अघि बढ्नुपर्छ।”

उनले भनिन्,“हामीले छोरीहरूलाई पढाउनुपर्छ, उनीहरूलाई आत्मनिर्भर बनाउनु पर्दछ। महिला शिक्षित भए मात्र सिङ्गो परिवार शिक्षित हुन्छ र समाज रूपान्तरण हुन्छ।”

सहभागीहरूले महिलाको नेतृत्व, परिवारमा महिलाको भूमिका, शिक्षा र आर्थिक स्वावलम्बनका विषयमा खुला छलफल गरेका थिए। कार्यक्रमका क्रममा विभिन्न वक्ताहरूले महिलाहरूको सशक्तीकरणका लागि विविध दृष्टिकोण प्रस्तुत गरेका थिए। वक्ताहरूले विशेष गरी समाजमा महिलाहरूको नेतृत्वदायी भूमिका कसरी बढाउन सकिन्छ भन्ने विषयमा विचार व्यक्त गरेका थिए । उनीहरुले आर्थिक, सामाजिक, शैक्षिक र राजनीतिक रूपमा महिलाहरूलाई अगाडि बढाउन आवश्यक नीतिहरू लागू गर्नुपर्नेमा जोड दिए। परिवार एकाइभित्र महिलाहरूको भूमिका अपरिहार्य रहेको र उनीहरूको सशक्तीकरण बिना समाजको सही विकास हुन नसक्ने विषयमा चर्चा गरिएको थियो। महिलाहरू घरको मेरुदण्ड मात्र नभएर समाजका हरेक तहमा नेतृत्वदायी भूमिकामा रहनुपर्ने धारणा वक्ताहरूले राखेका थिए ।

कार्यक्रममा बोल्दै चैतन्य ग्रुप अफ कम्पनीका प्रमुख कार्यकारी अधिकृत गणेशप्रसाद जोशीले उपस्थित सम्पूर्ण लाई धन्यवाद दिँदै शिक्षा नै महिलाको सशक्तीकरणको मूल आधार भएको बताए। महिला शिक्षित भएमा समाजमा सचेतना फैलाउन सकिने र उनीहरू आर्थिक रूपमा पनि आत्मनिर्भर बन्ने वातावरण तयार गर्न सकिने उनले बताए ।

अभिभावकहरूले महिलाहरूलाई आर्थिक रूपमा सबल बनाउनुपर्नेमा जोड दिए भने केहीले घरभित्रै हुने लैङ्गिक भेदभाव हटाउनुपर्ने भनाई रहेको थियो । महिलाहरू अझै पनि घरपरिवारको सीमाभित्र मात्रै सीमित रहेका र आत्मनिर्भर हुन, बाहिरको विश्व हेर्न र आफ्नो भविष्य निर्माण गर्न शिक्षा, सीप र अवसरको आवश्यकता रहेको भनाइ राखेका थिए ।

कार्यक्रमले महिला सशक्तीकरण, नारी नेतृत्व र लैङ्गिक समानताको विषयलाई गहिरोसँग उजागर गरेको छ। सहभागीहरूले कार्यक्रम निकै प्रभावकारी भएको प्रतिक्रिया दिएका थिए ।