धनगढी । बैतडीमा जिप दुर्घटना हुँदा एक जनाको मृत्यु भएको छ भने ३ जना भने घाइते छन् ।
जिल्लाको दशरथचन्द नगरपालिका–११ नानिगाडस्थित देहीमाण्डौं-गिरेगडा भित्री सडक खण्डमा शुक्रबार राति बिएसी ५६५९ नम्बरको जिप दुर्घटनामा परेको प्रहरीले जनाएको छ।
सुदूरपश्चिम प्रदेश प्रहरी कार्यालय धनगढीका अनुसार पञ्चेश्वर गाउँपालिका-५ बस्ने ५४ वर्षीय चंचले दयाल गम्भीर घाइते भई उपचारको लागि जिल्ला अस्पताल बैतडी लगिएकोमा चिकित्सकले चेकजाँच गर्दा मृत्यु घोषणा गरेको हो ।
जिप दुर्घटनामा परेर पञ्चेश्वर गाउँपालिका–६ घर भएका जिप चालक ३५ वर्षीय राकेश कोली, सोही ठाउँका ५२ वर्षीय लालीराम कोली र दशरथचन्द नगरपालिका-१० की ३० वर्षीया कविता परियार घाइते भएको जनाइएको छ । घाइतेहरुको जिल्ला अस्पताल बैतडीमा उपचार भइरहेको प्रहरीले जनाएको छ ।
