धनगढी । प्रहरीले कैलाली र कञ्चनपुरमा भन्सार छलीका सामान नियन्त्रणमा लिएको छ । शनिबार दुई जिल्लाका विभिन्न ठाउँबाट भन्सार छलीका सामान नियन्त्रणमा लिएको हो ।
कैलालीको धनगढी उपमहानगरपालिका – ७ बेली, वडा नं. १५ सिद्धबाबा सामुदायीक वन र टीकापुर नगरपालिका–९ झुङ्गाबाट अवैध रुपमा भारतबाट भन्सार छलि गरि ल्याएका अन्दाजी मूल्य रु ८९ हजार ६ सय बराबरको बिडी, गुट्खा, सुर्ति, प्लाष्टिकका भाडाहरु, तरकारीको बीउहरु, कालो प्लाष्टिक, चकलेट लगायतका सामानहरु जिल्ला प्रहरी कार्यालय कैलाली मातहत कार्यालयहरुबाट खटिएको प्रहरी गस्ती टोलीले बेवारिसे अवस्थामा फेला पारी नियन्त्रणमा लिएको जनाइएको छ ।
त्यस्तै,कञ्चनपुरको बेलौरी नगरपालिका–१० सडकघाटबाट अवैध रुपमा भारतबाट भन्सार छलि गरि ल्याएका अन्दाजी मूल्य रु ११ हजार ६ सय बराबरको चिसो पेय पदार्थ (स्प्राईट, ड्यु, कोकाकोला) लगायतका सामानहरु जिल्ला प्रहरी कार्यालय कञ्चनपुर मातहत कार्यालयहरुबाट खटिएको प्रहरी गस्ती टोलीले बेवारिसे अवस्थामा फेला पारी नियन्त्रणमा लिएको सुदूरपश्चिम प्रदेश प्रहरी कार्यालय धनगढीले जनाएको छ ।
