धनगढी । चाडपर्वको समयमा हुन सक्ने सवारी दुर्घटना न्यूनीकरण, ट्राफिक नियमको प्रभावकारी कार्यान्वयन तथा लागूऔषधको ओसारपसार नियन्त्रण गर्न सुदूरपश्चिम प्रदेशमा संयुक्त रूपमा सवारी चेकजाँचलाई तीव्र पारिएको छ।
सुदूरपश्चिम प्रदेश प्रहरी कार्यालयअन्तर्गत के-नाइन शाखा, ट्राफिक प्रहरी तथा जनपद प्रहरीको संयुक्त टोलीले प्रदेशका विभिन्न स्थानमा नियमित चेकजाँच गरिरहेको छ।
चेकजाँचका क्रममा तालिमप्राप्त कुकुरसमेत परिचालन गरी सवारीसाधनको जाँच, शङ्कास्पद व्यक्ति तथा गतिविधिमाथि निगरानी बढाइएको सुदूरपश्चिम प्रदेश प्रहरी कार्यालय धनगढीले जनाएको छ। लागूऔषधको ओसारपसार तथा प्रयोग नियन्त्रणका लागि समेत विशेष निगरानी र जाँचलाई प्रभावकारी बनाइएको जनाइएको छ ।
प्रहरीले सवारी चालकको मापसे परीक्षण गर्नुका साथै चालक अनुमतिपत्र तथा आवश्यक सवारी कागजातसमेत जाँच गरिरहेको छ।
चाडपर्वको समयमा यात्रुसँग निर्धारितभन्दा बढी भाडा असुल्ने, यात्रुलाई दुःख-हैरानी दिने तथा ठगी गर्ने जस्ता गतिविधि हुन सक्ने भएकाले त्यस्ता सवारीसाधन तथा चालकलाई समेत निगरानीमा राखिएको जनाइएको छ।
नियमविपरीत कार्य गर्ने चालक तथा सम्बन्धित व्यक्तिमाथि दैनिक रूपमा आवश्यक कानुनी कारबाही अघि बढाइएको प्रहरीले जनाएको छ ।
