धनगढी । नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय अत्तरियाले सवारी साधनको गति जाँच गर्न ‘राडार स्पिड गन’को प्रयोग गर्न थालेको छ ।
अत्तरिया–धनगढी छ लेन सडक भित्र सवारी साधनको गति जाँच गर्न सो ‘राडार स्पिड गन’को प्रयोग गर्न थालिएको हो ।
सडकमा सवारी साधनको स्पिड बढी हुँदा दुर्घटनाको जोखिम हुने भएकाले ‘राडार स्पिड गन’को प्रयोग गरिएको कार्यालयका सूचना अधिकारी एवं प्रहरी नायव उपरीक्षक टेकबहादुर जोराले निशाना न्युजलाई जानकारी दिए । मेसिनले सवारी साधनको स्पिड जाँच गर्ने हुँदा दर्घटना न्युनिकरण भएर जाने उनले बताए ।
दुर्घटना न्युनिकरणका लागि चालकसँग १ मिनेट कार्यक्रम ३ हजार ९२३ पटक, स्कुल सम्पर्क कायक्रम एक सय पचास पटक आयोजना गरि सचेतनाका कार्यक्रम गरिएको उनले बताए । अभिभावकसँग ट्राफिक प्रहरी,मापसे तथा लेन अनुशासन सम्बन्धी जनचेतनामुलक कक्षा सञ्चालन १५८ पटक, पहाडी रुटमा टाइमकार्ड कडा रुपमा लागु गरिएको उनले बताए ।
त्यस्तै,उनले सार्वजनिक यात्रुबाहक बसहरुमा २ जना चालक भए नभएको टिसीए एपीपी मार्फत चेकजाँचलाई निरन्तरता दिएको,गत चैत १३ गतेदेखि टेक्टर बहस कार्यक्रम सञ्चालन गरेको उनले बताए ।
उनका अनुसार चालु आवको चैत मसान्तसम्म ४१ हजार ६ सय ८४ सवारी साधन कारबाहीमा परेको तथा २ करोड ९८ लाख २६ हजार राजस्व संकलन भएको छ । उनका अनुसार आव २०७९/८० मा १ लाख १२ हजार ६५५ सवारी साधन कारबाहीमा परेका तथा ६ करोड ४३ लाख ७२ हजार राजस्व संकलन भएको र गत आव २०८०/८१ मा ७३ हजार ४७९ सवारी साधन कारबाहीमा परेका तथा ४ करोड ८९ लाख ८७ हजार राजस्व संकलन भएको छ ।
त्यस्तै,चालु आवका चैत मसान्तसम्म ७ सय ३३ सवारी दुर्घटना हुँदा १ सय ४१ जनको मृत्यु भएको,आव २०७९/८० मा २ सय ५२ सवारी दुर्घटना हुँदा १ सय ७७ जनाको मृत्यु भएको र गत आव २०८०/८१ मा ३ सय ९ सवारी दुर्घटना हुँदा १ सय ७२ जनाको मृत्यु भएको उनले जानकारी दिए ।
