धनगढी । नेकपा (माओवादी केन्द्र) ले आयोजना गरेको तराई–मधेश हुलाकी राजमार्ग जागरण अभियानका लागि माओवादीका शीर्ष नेता धमाधम कैलाली भित्रिने क्रम बढेको छ ।
माओवादीले मङ्गलबार कैलालीको टीकापुरमा गर्न लागेको अभियानमा सहभागी हुन पूर्व उपराष्ट्रपति तथा नेकपा (माओवादी केन्द्र) का उपाध्यक्ष नन्दकिशोर पुन पासाङ कैलाली आइपुगेका छन् भने वरिष्ठ उपाध्यक्ष नारायणकाजी श्रेष्ठ पनि कैलाली आइपुगेको माओवादी नेता रमेशप्रसाद भट्टराईले जानकारी दिए ।
जागरण अभियानलाई सम्बोधन गर्नका लागि पूर्व प्रधानमन्त्री तथा माओवादी केन्द्रका अध्यक्ष पुष्पकमल दाहाल प्रचण्ड सोमबार साँझ बर्दिया भएर कैलाली पुग्ने जनाइएको छ । उनलाई सत्ती पुलमा माओवादी प्रदेश कमिटी र पार्टीका उपमहासचिव एवम् सुदूरपश्चिम प्रदेश इन्चार्ज गिरीराजमणि पोखरेलले स्वागत गर्ने कार्यक्रम रहेको जनाइएको छ ।
जागरण अभियानका लागि उपाध्यक्ष पम्फा भुषाल, महासचिव देव गुरुङ लगायतका नेता आउने जनाइएको छ । माओवादीको जागरण अभियानको क्रममा भोलि अध्यक्ष प्रचण्डले टीकापुर, कैलारी गाउँपालिका र धनगढी उपमहानगरपालिकामा शहीद परिवारलाई भेटघाट र जागरण सभालाई सम्बोधन गर्ने कार्यक्रम रहेको छ ।
