धनगढी । सुदूरपश्चिम प्रदेशका भौतिक पूर्वाधार विकासमन्त्री ओमविक्रम भाट ‘सरल’ले नेपालको वर्तमान संविधान जनताको लामो संघर्षबाट प्राप्त राजनीतिक उपलब्धि र परिवर्तनको संस्थागत आधार भएको बताएका छन ।
संविधान दिवस तथा राष्ट्रिय दिवस-२०८३ को अवसरमा आज शुभकामना सन्देश जारी गर्दै उनले अहिलेको संविधान नेपाली जनताको अभूतपूर्व त्याग,बलिदान र निरन्तर संघर्षको जगमा निर्मित भएको बताए ।
मन्त्री भाटले संविधानले लोकतान्त्रिक गणतन्त्र, संघीयता, समावेशिता, समानुपातिक प्रतिनिधित्व तथा सामाजिक न्यायलाई संस्थागत गर्दै इतिहासदेखि पछाडि पारिएका तथा राज्यको मूलधारबाट वञ्चित वर्ग, समुदाय, जातजाति, क्षेत्र र लिङ्गका अधिकारलाई संवैधानिक सुनिश्चितता प्रदान गरेको बताए ।
उनले भनेका छन् ‘संविधान दिवस संघर्ष,बलिदान र उपलब्धिको स्मरण गर्ने दिन मात्र नभई संविधानका मूल मर्म र जनताका अधिकारको रक्षा गर्दै समतामूलक,न्यायपूर्ण र समृद्ध समाज निर्माण गर्ने संकल्प गर्ने दिन हो ।’
मन्त्री भाटले संविधान दिवस तथा राष्ट्रिय दिवस २०८३ को अवसरमा स्वदेश तथा विदेशमा रहेका सम्पूर्ण नेपालीमा सुख,शान्ति, समृद्धि, सुशासन, सामाजिक न्याय र आपसी भाइचाराको शुभकामना व्यक्त गरेका छन्।
मन्त्री भाटले जनयुद्ध,जनआन्दोलन,मधेस आन्दोलन,थारु आन्दोलनलगायत सम्पूर्ण मुक्ति तथा अधिकारका संघर्षका क्रममा जीवन उत्सर्ग गर्ने सहिदहरूप्रति भावपूर्ण श्रद्धाञ्जली अर्पण गर्नुका साथै बेपत्ता तथा घाइते योद्धाहरूप्रति उच्च सम्मानसमेत व्यक्त गरेका छन् ।
