धनगढी । सुदूरपश्चिम प्रदेका मुख्यमन्त्री खगराज भट्टले नेपालको वर्तमान संविधान नेपाली जनताको ठूलो त्याग र बलिदानबाट निर्माण भएको बताएका छन् ।
संविधान दिवस तथा राष्ट्रिय दिवस–२०८३ को अवसरमा शनिबार सुदूरपश्चिम प्रदेश सरकारले आयोजना गरेको कार्यक्रममा बोल्दै उनले यस्तो बताएका हुन् ।
उनले यो संविधानले नेपालका सबै जातजाति,भाषाभाषी,धर्म,संस्कृति,क्षेत्र समुदायलाई अधिकार सम्पन्न बनाएको बताए ।
मुख्यमन्त्री भट्टले इतिहासमा पनि कसैले यस्तो संविधान प्राप्त नगरेको बताउँदै यो संविधान जोगाउनलाई सबै जनताको दिलदिलमा पु¥याउन जरुरी रहेको बताए ।
उनले भने ‘यो संविधानले सबै भाषाभाषीको धर्म संस्कृतिलाई एउटै सुत्रमा उन्ने एउटा सप्तरङ्गी राष्ट्रियताको संरक्षण गर्ने संविधानको रुपमा हामीले पाएका छौँ ।’
‘यो संविधानमा समस्या छैन् हामी भन्दैनौँ । यसलाई परिमार्जन,समयचक्रमा पुनर्लेखनका अवधारणा आवश्यक होलान’, उनले भने ‘तर आजको हकमा विमत्तिहरुका बीच सहमति खोज्ने र अधिकारलाई संस्थागत गर्ने,सबै प्रकारका राजनीतिक धार,प्रवृति,चिन्तनलाई संगठित गर्ने योभन्दा उत्कृष्ठ दस्तावेज अरु हुन सक्दैनथ्यो ।’
उनले वर्तमान संविधान मार्गदर्शन,जीवन दर्शन र राष्ट्रका सबै राजनीतिक धारा प्रवृतिको पहिचानको प्रतिविम्ब भएको बताउँदै यसलाई जोगाउनु सबैको कर्तव्य भएको बताए ।
कार्यक्रममा सुदूरपश्चिम प्रदेश प्रमुख नजिर मियाँ,सभामुख भीमबहादुर भण्डारी,प्रदेश सरकारका मन्त्रीहरु,उपसभामुख,प्रदेशसभा सदस्यहरु,पूर्व मुख्यमन्त्री,प्रदेशस्थित सुरक्षा निकायका प्रमुख, प्रदेश सचिवहरु,कर्मचारी,सर्वसाधारणलगायतको उपस्थिति रहेको थियो ।
