धनगढी । सुदूरपश्चिम प्रदेशमा एक महिनामा एक सय ५४ जना मानिस हराएका छन् । सुदूरपश्चिम प्रदेश प्रहरी कार्यालयका अनुसार हराएकामध्ये एक सय तीन जना फेला परेका छन् ।
हराउनेमा ६७ महिला,२६ पुरुष, १३ बालक,४२ बालिका र ६ ज्येष्ठ नागरिक रहेका सुदूरपश्चिम प्रदेश प्रहरी कार्यालय धनगढीका प्रवक्ता प्रहरी वरिष्ठ उपरीक्षक पदमबहादुर बिष्टले जानकारी दिए ।
फेला पर्नेमा ४३ महिला,१७ पुरुष,१२ बालक,२८ बालिका,३ ज्येष्ठ नागरिक रहेका उनले जानकारी दिए । त्यस्तै,प्रदेशभरी भदौ महिनामा भएका दुई सय २५ सवारी दुर्घटना हुँदा १५ जनाले ज्यान गुमाएका तथा तीन सय ८० जना घाइते भएका सुदूरपश्चिम प्रदेश प्रहरी कार्यालयले जनाएको छ ।
उक्त दुर्घटनामा तीन सय पाँच वटा सवारी साधन संलग्न रहेको प्रहरीले जनाएको छ । ती दुर्घटनामध्ये एक सय ८० चालकका कारण,तीन सवारी साधनका कारण,नौ मादक पदार्थ सेवनका कारण, एउटा यात्रुका कारण,१७ पैदल यात्रीका कारण,एक मौसमका कारण र १४ चौपायाकारण भएका जनाइएको छ ।
सो एक महिनाको अवधिमा ट्राफिक नियम उल्लंघन गर्ने तीन हजार नौ सय ४३ सवारी चालकलाई गरिएको कारबाहीबाट रु ३२ लाख २० हजार पाँच सय जरिवाना असुल भएको प्रहरीले जनाएको छ ।
त्यस्तै,राजस्व चुहावट तथा भन्सार छली नियन्त्रणतर्फ रु एक करोड ८२ लाख नौ हजार तीन सय ९३ बराबरका भन्सार छलीका सामान नियन्त्रणमा लिएको जनाइएको छ । भन्सार छलीमा संलग्न १६ जनालाई नियन्त्रणमा लिइएको प्रहरीले जनाएको छ ।
