धनगढी– नयाँ उपराष्ट्रपति चयनका अहिले नयाँ बानेश्वरस्थित संघीय संसद् भवनमा मतदान भइरहेको छ । मतदानका लागि आज बिहान १० देखि दिउँसो ३ बजेसम्मको समय निर्धारण गरिएको छ ।
उपराष्ट्रपतिका लागि चार उमेदवार छन् । नेकपा (एमाले)बाट अष्टलक्ष्मी शाक्य, जनमत पार्टीबाट ममता झा, जनता समाजवादी पार्टी (जसपा)बाट रामसहायप्रसाद यादव र सोही पार्टीकी प्रमिला यादवले उमेदवारी दिएका हुन् ।
चारमध्ये तीन महिला उम्मेदवार छन् । यीमध्ये दुई उम्मेदवार यस्ता छन् जसमा एकले मतदान गर्न नपाउने र अर्काले मत नै नपाउने भएका छन् । उपराष्ट्रपतिका उमेदवार शाक्य सांसद नभएका कारण मतदान गर्न नपाउने भएकी हुन् ।
उपराष्ट्रपति पदको निर्वाचनमा संघीय संसद् (प्रतिनिधिसभा र राष्ट्रियसभा) र प्रदेशसभाका सांसदले मात्र मतदान गर्नेछन् ।
यस्तै अर्का महिला उम्मेदवार प्रमिलाले रामसहायलाई समर्थन गरेपछि उनको उमेदवारी निष्क्रिय भएको छ । तर, निधारित अवधिभित्र उनले उमेदवारी फिर्ता नलिएपछि मतपत्रमा उनको पनि नाम र तस्बिर भने हुनेछ । उमेदवारी निष्क्रिय गरेको बताएकाले उनले मत नपाउन सक्नेछिन् ।
उपराष्ट्रपतिका उमेदवार रामसहायप्रसाद यादवले पहिलो मतदान गरेका छन् । प्रदेशसभाका ५५० र संघीय संसद्का ३३२ मतदाता रहेका छन् ।
मतदाताको अन्तिम नामावलीमा नाम समावेश भइसकेपछि जनता समाजवादी पार्टी (जसपा)की सांसद सहनाज रहमानको निधन भएको थियो ।
उपराष्ट्रपति निर्वाचनमा एक संघीय सांसदको मतभार ७९ र एक प्रदेश सांसदको मतभार ४८ गणना हुन्छ ।
उपराष्ट्रपति निर्वाचनको मतपरिणाम आजै साँझ सार्वजनिक गरिने निर्वाचन अधिकृतको कार्यालयले जनाएको छ ।
