धनगढी- पूर्व सञ्चारमन्त्री तथा नेपाली कांग्रेसका केन्द्रीय सदस्य डा. मिनेन्द्र रिजालले सरकारलाई उत्तरदायी बनाउन प्रदेश सभा र प्रदेश सभाका समिति अझ बढी क्रियाशील हुनुपर्ने बताएका छन् ।
धनगढीमा सञ्चालन भइरहेको प्रभावकारी संसदीय अभ्यास तथा कानुन निर्माणमा प्रदेश सभा सदस्यहरूको भूमिका विषयक दुई दिने अभिमुखीकरण कार्यक्रममा उनले सो धारणा राखेका हुन् ।
नेता रिजालले संसदीय समितिमा विषयविज्ञ, सरोकारबाला, सरकारमा रहेका मन्त्रीहरू, विभिन्न सरकारी निकायका अधिकारीलाई राखेर नयाँ तरिकाले समेत समितिका बैठक चलाउनु पर्ने बताए ।
अहिलेसम्मका संसदीय समितिका बैठकहरू खास परिणाममुखी नभएकाले अब कसरी परिणाममुखी बनाउन सकिन्छ ध्यान दिनुपर्ने उनको भनाइ छ । सरकारलाई जिम्मेवार बनाउन प्रदेश सभा बैठकमा होस्कि संसदीय समितिमा प्रश्न गरिरहनु पर्ने उनको सुझाव छ ।
सुदूरपश्चिम प्रदेश सभाको आयोजना र राष्ट्रसङ्घीय विकास कार्यक्रम, संसद् सहयोग परियोजना र नेपाल सेन्टर फर सेक्युरिटी गभर्नेन्सको आयोजनामा भइरहेको अभिमुखीकरण कार्यक्रममा प्रतिनिधि सभाका पूर्व सांसद डा.दीपकप्रसाद भट्टले अन्तर्राष्ट्रिय रूपमा भएका संसदीय प्रक्रियामा संसदीय सुपरिवेक्षणका बारेमा प्रकाश पार्दे नेपालको संसदीय निगरानी कसरी प्रभावकारी बनाउन सकिन्छ भन्ने उदाहरण प्रस्तुत गरे ।
अभिमुखीकरणमा प्रतिनिधि सभाका पूर्व सांसद अञ्जना विशंखेले लैङ्गिक समानता तथा सामाजिक समावेशीकरणको दृष्टिकोणबाट संसदीय निगरानीबारे छलफल गरेका थिए ।
यस्तै, सङ्घीय संसद्का पूर्व सचिव ध्रुव घिमिरेले संसदीय गिरानीका औजार, उपकरण र तिनको प्रयोगबारे प्रस्तुति गरेका थिए । नेपाल सेन्टर फर सेक्युरिटी गभर्नेन्सका अध्यक्ष अभय जोशीका अनुसार प्रदेश सभा सदस्यहरूको भूमिका विषयक दुई दिने अभिमुखीकरण कार्यक्रम सातै प्रदेशमा आयोजना हुनेछ ।
