अछाम- संघीय सरकार र प्रदेश सरकारले बजेट ल्याएसँगै मेल्लेख गाउँपालिका पनि बजेट पूर्वतयारीमा जुटेको छ। बजेट पूर्व तयारीसँगै चालु आर्थिक वर्षको अन्त्यमा आइपुगेकाले जनप्रतिनिधि चालु आवमा भएको कामको अनुगमन तथा समिक्षा पनि गरिरहेका छन् ।

स्थानीय तहहरुले १० असारमा बजेट ल्याइसक्नुपर्ने संवैधानिक बाध्यता रहेको छ । १० असार अघि नै नीति कार्यक्रम ल्याउनेछन् । त्यसै अनुसार मेल्लेख गाउँपालिकाका जनप्रतिनिधिहरु आगामी आर्थिक वर्षको बजेटको तयारीमा जुटेका छन् ।

मेल्लख गाउँपालिका अध्यक्ष ज्वालासिंह साउद, उपाध्यक्ष नृपबहादुर खड्का, विषयगत शाखाका प्रमुखहरु वडामै पुगेर आगामी आर्थिक वर्षका योजनाको लागि छलफलमा जुट्नु भएको छ ।

दीगो विकासको लागि स्थानीय सहभागितालाई अनिवार्य शर्त राखेर वडामै पुगेर आगामी आर्थिक वर्षको लागि योजना छनोट गर्ने कार्य सुरु गरिएको मेल्लेख गाउँपालिकाका अध्यक्ष ज्वाला सिंह साउदले जानकारी दिनुभएको छ ।

उहाँले जनताको आवश्यकताका आधारमा वडाबाट आएका योजनालाई प्राथमिकता दिएर आगामि आर्थिक वर्ष २०८०/८१ को वजेट निर्माण गरिने समेत जानकारी दिनुभएको छ । सबै वडाबाट योजना प्राप्त भएपछि प्राथमिकीकरण गरिने अध्यक्ष साउदको भनाई रहेको छ।

स्थानीय तहले जनप्रतिनिधि पाएपछि नीति नियम अनुसार जनसहभागिता मूलक गराएर सुशासन र पारदर्शिता कायम हुने गरी योजना छनोट गरिने अध्यक्ष साउदको भनाई रहेको छ ।

उहाँले शुक्रबारबाट सुरु भएको भेलामा वडाका सम्पूर्ण जनप्रतिनिधि, राजनीतिक दल, शिक्षक, पूर्व जनप्रतिनिधि लगायत सरोकारवालाई सुझावको लागि आमन्त्रण गरिएको उहाँको भनाई रहेको छ ।

वडातहमा योजना छनौट र प्राथमिकीकरण काम सम्पन्न भएपछि  त्यसैका आधारमा आगामी आर्थिक वर्षको नीति तथा कार्यक्रम र बजेट तयार गरिने अध्यक्ष साउदको भनाइरहेको छ । आगामि आर्थिक वर्षका लागि खुद्रे भन्दा ठोस योजना ल्याउने अध्यक्ष रहेको छ ।

नागरिकबाट योजना छनोट गर्दा त्यस क्षेत्रको वास्तविक आवश्यकताका योजना छनोट हुने उहाँको भनाइ छ । जनताबाट अति आवश्यक पर्ने योजना छनोट गर्न लगाएर योजना ल्याइने बताउनुभयो ।

यद्यपि, गत बर्षको तुलनामा बजेट कम आएको र स्थानीय तहमा विकासको चाहना र आवश्यकता बढी भएकाले त्यसको संयोजक गर्न कठिन देखिएको उहाँको भनाई रहेको छ ।

मेल्लेख गाउँपालिका वडा नं. ४ कुष्कोटका वडा अध्यक्ष चन्द्र साउदले टोल भेलाबाट प्राथमिकिरण भएर आएका योजनालाई वडा भेलाले प्राथमिकता दिने जानकारी दिनुभयो । टोल, बस्तीमा पुगेर स्थानीयका योजना लिने काम वडाबाट सम्पन्न भएको उहाँको भनाई रहेको छ ।

टोलमा भएको छलफलपछि आएका विकासका चाँसो आवश्यकता र बजेटको उपलब्धता अनुसार प्राथमिकतामा राखिने उहाँको भनाई रहेको छ ।

मेल्लेख गाउँपालिका निवर्तमान उपाध्यक्ष धनबहादुर शाहले गाउँपालिका अध्यक्ष आफै वस्तिमा आएर योजना छनोट गर्ने कार्य सह्ररानीय रहेको बताउनुभयो ।

उहाँले गाउँपालिका अध्यक्ष आफै बस्तिमा आउँदा जनताको आवश्यकताका आधारमा योजना छनोट हुने विश्वास व्यक्त गर्नुभयो । यो कार्यले भनसुनबाट आउने परिपाटीको अन्त्य हुने समेत धारणा व्यक्त गर्नुभयो ।

मेल्लेख गाउँपालिकाले शुक्रबार वडा नं. ४ कुष्कोट र वडा नं. ८ हात्तिकोटमा योजना तर्जुमा सम्वन्धी पूर्व तयारी वैठक सम्पन्न गरेको छ । शनिबार वडा नं.१ गोपालेगाउँ र २ डाडांसिरी ऋषिदह, असार ३ गते ठाटी, असार ५ गते वडा नं. ६ शोडषा र वडा नं.७ नन्देगडा र असार ६ गते वडा नं. ५ विन्देवासिनीमा योजना तर्जुमा सम्वन्धी पूर्व तयारी वैठक आयोजना गरिने प्रमुख प्रशासकीय अधिकृत धु्रर्वप्रसाद सापकोटाले जानकारी दिनुभयो ।

विकासका विभिन्न चरणमध्ये योजना छनोटदेखि विकास योजनाको अनुगमनसम्म जनसहभागिता सुनिश्चित गरिएको प्रमुख प्रशासकीय अधिकृत सापकोटाको भनाई रहेको छ ।