धनगढी- जिल्ला प्रहरी कार्यालय कैलालीमा विभिन्न अपराधका एक सय ५० वटा मुद्दा दर्ता भएका छन् । चालु आव २०७९/८० को जेठ मसान्तसम्म उक्त संख्याका मुद्दा दर्ता भएका हुन् । जिल्ला प्रहरी कार्यालय कैलालीका प्रमुख एवं प्रहरी उपरीक्षक देवेन्द्रबहादुर पालका अनुसार चालु आवको ११ महिनामा जबरजस्ती करणीका ८०, बहुविवाहका ३३, जबरजस्ती करणी उद्योगका २१, यौन दुराचार ९ बाल यौन दुरुपयोगका ६, बालविवाह २ मुद्दा दर्ता भएका छन् ।
त्यस्तै सोही अवधिमा मानव बेचबिखन तथा जबरजस्ती करणीका ३, मानव बेचबिखन तथा ओसार पसारका २ र कर्तव्य ज्यानका १ मुद्दा दर्ता भएको जिल्ला प्रहरी कार्यालय कैलालीको तथ्याङ्क छ ।
उक्त मुद्धाहरुमध्ये जेठसम्म १४४ वटा मुद्धाहरु फर्छ्यौट भएको जिल्ला प्रहरी कार्यालय कैलालीले जनाएको छ । सो मुद्धाहरुमा १५३ पुरुष र ३६ महिला पक्राउ परेको जनाइएको छ । गत आव २०७८/७९ मा विभिन्न मद्धाका २१४ दर्ता तथा पछ्र्यौट भएको र सो मुद्दामा २२० पुरुष र ४३ महिला पक्राउ परेको जनाएको छ ।
त्यस्तै लागु औषध सम्बन्धी चालु आवको जेठ मसान्तसम्म ३ सय ३ मुद्दा दर्ता भएको जिल्ला प्रहरी कार्यालय कैलालीको तथ्याङ्क छ । जसमा ३४६ जना पक्राउ परेको र ७२६ ग्राम १२८ मिलिग्राम खैरो हेरोइन, ५४७ ट्याब्लेट नाईट्राभेट, २४४ स्पास्मो, ४० किलो ७५२ ग्राम १२१० मिलिग्राम चरेस, १३०२ क्याप्सुल नाईट्राजपाम, १२८ ग्राम गाँजा र ७ ब्रोनोफिन बरामद गरिएको जनाइएको छ ।
