दार्चुला- भारत सरकारले दार्चुलाको नौगाड गाउँपालिका वडा नम्बर ३ मा रहेको जामिर अस्पताललाई उपहार स्वरूप एम्बुलेन्स सहयोग गरेको छ । आइतबार काठमाण्डौको भारतीय राजदूतावासमा आयोजित कार्यक्रममा जिल्लाको नौगाड गाउँपालिका अध्यक्ष दलजित सिंह धामीलाई भारतीय राजदूत नवीन श्री वास्तवले एम्बुलेन्सको चाबी हस्तान्तरण गरेका हुन् ।
गाउँपालिकाको वडा—३ मा १० शैया अस्पतालका लागि एम्बुलेन्स सहयोग गरेको पालिका अध्यक्ष दलजितसिह धामीले बताउनु भयो । सहयोग स्वरूप प्राप्त भएको एम्बुलेन्स तत्काल सञ्चालनमा आउने बताइएको छ ।
नेपालको स्वास्थ्य तथा शिक्षा क्षेत्रमा सहयोग पु¥याउँदै आएको भारत सरकारले सन् १९९४ देखि भारतको स्वतन्त्रता दिवस र गणतन्त्र दिवसका अवसरमा नेपालका विभिन्न क्षेत्रका लाभग्राही संस्थालाई एम्बुलेन्स तथा स्कुल बस उपहारस्वरूप प्रदान गर्दै आएको गाउँपालिका अध्यक्ष धामीले बताए ।
एम्बुलेन्स प्राप्तिका लागि असार २६ गते मंगलबार गाउँपालिका अध्यक्ष दलजित सिंह धामी र भारतीय राजदूत नवीन श्री वास्ता बिच सम्झौता पत्रमा हस्ताक्षर भएको थियो ।
एम्बुलेन्सले पालिकाभरिका नागरिकहरूलाई सेवा दिने गाउँपालिकाले जनाएको छ । विशेष गरी गाउँपालिकाले गर्भवती महिला, दिर्धरोगी समस्यामा परेका बिरामीहरूलाई सेवा दिने जनाएको छ ।
एम्बुलेन्स सहयोग गरेकोमा गाउँपालिका अध्यक्ष धामीले भारतीय राजदूतलाई धन्यवाद दिएका छन । भारत सरकारले नेपालका विभिन्न जिल्लाका स्वास्थ्य र शिक्षा क्षेत्रमा काम गर्ने सङ्घ–संस्थालाई ३४ वटा एम्बुलेन्स र ५० वटा स्कुल बस उपहारस्वरूप प्रदान गरेको छ ।
यस कार्यक्रमअन्तर्गत सन् १९९४ यता भारतले नेपालका विभिन्न जिल्लामा रहेका विभिन्न सङ्घसंस्थालाई नौ सय ७४ वटा एम्बुलेन्स र दुई सय ३४ स्कुल बस उपहारस्वरूप उपलब्ध गराइसकेको जानकारी दिइएको छ ।
