धनगढी- नेपाल इन्जिनिर्यस एशोसिएसन, सुदूरपश्चिम प्रदेशले ६१ औँ इन्जिनीयर दिवस विविध कार्यक्रम गरी मनाएको छ । बुधबार धनगढीमा एक कार्यक्रम गरी दिवस मनाएको हो । कार्यक्रमको प्रमुख अतिथि सुदूरपश्चिम प्रदेशका प्रदेश प्रमुख देवराज जोशी रहेका थिए ।
कार्यक्रमा बोल्दै प्रदेश प्रमुख जोशीले विकासको मेरुदण्ड पूर्वाधारसंग जोडिएका व्यक्तित्वहरु इन्जिनीयरले देश निर्माणमा महत्वपूर्ण भूमिका रहने गरेको बताए । उनले आफ्नो क्षेत्रबाट इन्जिनीयरको हकहितमा जहिले पनि सकारात्मक रहेको धारणा व्यक्त गरे ।
कार्यक्रममा इन्जिनीयर क्षेत्रमा रहेर सुदूरपश्चिम प्रदेशका विभिन्न जिल्लामा कार्यरत कर्मचारीहरुलाई सम्मान समेत गरेको हो । प्रमुख अतिथि प्रदेश प्रमुख जोशीले खादा र कदरपत्र दिएर सम्मान गरेका हुन् ।
सम्मानित हुनेहरुमा नेपाल इन्जिनिर्यस एशोसिएसन सुदूरपश्चिम पूर्व अध्यक्ष इन्जिनीयर लवप्रसाद जोशी, सुदूरपश्चिम विश्वविद्यालयमा कार्यरत इन्जिनीयर किसनदत्त भट्ट, भौतिक पूर्वाधार मन्त्रालय सुदूरपश्चिमका सचिव प्रेमदत्त भट्ट, केएस कन्ट्रक्सनका इन्जिनीयर भीमबहादुर पाल र बुढीनन्दा नगरपालिका बाजुरा उपमेयर इन्जिनीयर सृष्टि रेग्मी छन् ।
नेपाल इन्जिनिर्यस एशोसिएसन सुदूरपश्चिम प्रदेशका अध्यक्ष प्रदिपकुमार पन्तको अध्यक्षतमा भएको कार्यक्रममा नेपाल टेलिकम प्रादेशिक कार्यालय निर्देशक किशोरकुमार भट्ट पूर्वाधार कार्यालय सुदूरपश्चिमका निर्देशक जगतप्रसाद जोशी लगायतको उपस्थिति रहेको थियो ।
एशोसिएसन सुदूरपश्चिम प्रदेशका उपाअध्यक्ष भाष्कर चटौतले स्वागत मन्तव्य व्यक्र गरेको कार्यक्रममा विभिन्न क्षेत्रमा कार्यरत इन्जिनीयर, पत्रकाहरुको सहभागिता रहेको थियो । कार्यक्रमको सञ्चालन इन्जिनीयर हरेन्द्रबिक्रम शाहले गरेका हुन् । यस अघि धनगढी ट्राफिक चौराह देखि डेभिटी होटल सम्म प्रभात फेरि समेत निकालिएको थियो ।
