धनगढी- नेकपा (एमाले) सुदूरपश्चिम प्रदेश कमिटीले ऐतिहासिक प्रथम अधिवेशनको तयारी पूरा भएको छ। प्रदेश कमिटीले धनगढीमा शनिवार पत्रकार सम्मेलन गर्दै आइतबारदेखि सुरु हुने प्रथम अधिवेशनको सबै तयारी पूरा भएको जानकारी गराएको हो। धनगढीमा हुने अधिवेशनको उद्घाटन पार्टी अध्यक्ष केपी शर्मा ओलीले गर्ने प्रदेश अध्यक्ष दामोदर भण्डारीले बताए।
प्रदेश अध्यक्ष भण्डारीका अनुसार उद्घाटन कार्यक्रममा महासचिव शंकर पोखरेल, केन्द्रीय कमिटी सचिव तथा कर्णाली प्रदेश इन्चार्ज लेखराज भट्ट, केन्द्रीय कमिटी सचिव तथा सुदूरपश्चिम प्रदेश इन्चार्ज छविलाल विश्वकर्मा, स्थायी कमिटी सदस्य तथा संगठन विभाग प्रमुख काशीनाथ अधिकारी, स्थायी कमिटी सदस्य तथा खेलकुद विभाग प्रमुख कर्णबहादुर थापालगायत पनि सहभागी हुनेछन्।
प्रदेशका ९ जिल्लाबाट अधिवेशनमा ६ सय ७५ प्रतिनिधि सहभागी हुनेछन्। प्रथम अधिवेशन सम्पन्न गराउनका लागि १५० जना स्वयंसेवक परिचालन गरिने जनाइएको छ। जिल्लाबाट छानिएर आएका प्रतिनिधिहरूले एमाले प्रदेशको आगामी नेतृत्व चयन गर्नेछन्। अधिवेशन सोमबार नयाँ नेतृत्व चयन गर्दै समापन हुनेछ।
