धनगढी- उद्योग, वाणिज्य तथा आपूर्तिमन्त्री दिलेन्द्रप्रसाद बडूले रााष्ट्रिय उत्पादन बढाउनका लागि भएका उद्योगलाई पूर्ण क्षमतामा चलाउने र बन्द रहेका उद्योगलाई सञ्चालनमा ल्याइए मात्रै औद्योगिक उत्पादन बढ्न सक्ने बताएका छन् । शुक्रवार धनगढी विमानस्थलमा पत्रकार सम्मेलनमा मन्त्री बडूले यस्तो बताएका हुन् ।
उनले सञ्चालनमा रहेका उद्योगलाई पूर्ण क्षमतामा चलाउने र बन्द अवस्थामा रहेका उद्योगलाई सञ्चालनमा ल्याइएमा उत्पादन बढ्नुका साथै जनतालाई केही हदसम्म भए पनि रोजगारीको अवस्था सिर्जना गर्नमा मद्दत मिल्ने बताए ।
मन्त्री बडूले सरकारले मात्रै सबै उद्योग चलाउन नसक्ने बताए । ‘सरकारले मात्रै सबै उद्योग चलाउन सक्दैन बरु अब सरकार र निजी क्षेत्रको साझेदारीमा वा केही उद्योग अझ पूर्णत लिजमा दिएर सञ्चालन गरिए राजस्वमा योगदान पुग्न सक्दछ ।’ मन्त्री बडूले भने, ‘यसरी निजी क्षेत्रले सञ्चालन गरिदियो भने रोजगारी तथा राजस्व बढ्छ र राष्ट्रिय उत्पादन पनि बढ्छ ।’
मन्त्री बडूले भएका उद्योगलाई पूर्ण क्षमतामा चलाउने र रुग्ण उद्योगलाई सञ्चालनका निमित्त विभिन्न मोडेलमा सञ्चालन गरिने धारणा व्यक्त गरे। समयमै मलको प्रबन्ध गर्नमा केही विलम्ब भएको बताउँदै उनले अहिलेको लागि हामीले बाहिरबाटै ल्याउनुपर्ने भएको हुनाले यसको प्रबन्ध भइरहेको बताए । प्रदेश र संघको निर्वाचनका लागि हिजो मात्रै मन्त्रिपरिषद्बाट निर्वाचनको मिति तोकी सकिएको र त्यसको तयारी नै अहिलेको प्रमुख काम रहेको मन्त्री बडूले बताए ।
विगतको सरकार केपी ओलीको सरकारले संसदको अवधि पुर्णता दिन नचाहेकाले पटक –पटक संसद विघटन गरेकाले संसद र संविधान खतरामा परेपछि संविधानको रक्षाका लागि संसदको रक्षाका लागि यो सरकार बनेको उनले बताए ।
‘संविधानको रक्षागर्न संविधान सम्मत ढंगले संसदलाई पूर्णकाल चलाउने र पूर्णकाल चलाइसकेपछि तिनै तहका निर्वाचन सम्पन्न गर्न र मुलुक अब संविधान सम्बन्ध बाटोमा फकेको छ,’ उनले भने, ‘संसदले पूर्णता पाएको छ र मुलुकको संविधानको रक्षा भएको छ ।’ निर्वाचनको तयारीमा आफूहरु जुटेको उनले बताए । ‘चुनावसम्म गठबन्धन यथावात नै रहन्छ, ’मन्त्री बडूले भने, ‘मुलुक निर्वाचन पछि पनि एक साथ जानुपर्न हुन सक्दछ ।’
