धनगढी- सुदूरपश्चिम प्रदेशमा अपराधका घटनामा वृद्धि भएको छ । प्रदेशमा पाँच वर्षको अवधिमा १४ हजार अपराधिक घटना भएको तथ्यांक सार्वजनिक भएको छ । सुदूरपश्चिम प्रदेश प्रहरी कार्यालयको तथ्याङ्क अनुसार प्रदेशमा २०७४÷७५ देखि ०७८÷७९ सम्म १३ हजार ९४१ अपराधका घटना भएका छन् । यो अपराधका सवारी र विविध घटनासहितको तथ्यांक हो ।

तथ्यांक अनुसार ज्यान मार्ने उद्योग अन्तर्गत ५ वर्षमा २ हजार ५५०७ वटा घटना भएको छ । जसमध्ये ०७४÷०७५ मा ४ सय, ०७५÷०७६ मा ४१४, ०७६÷०७७ मा ५०४, ०७७÷०७८ मा ५८७ र ०७८÷०७९ मा ६०२ वटा घटना भएका छन् ।

यस्तै आत्महत्या दुरुत्साहन अन्तर्गत २ हजार ७८० घटना भएका छन् । जसमध्ये ०७४÷०७५ मा ४७८, ०७५÷०७६ मा ५००, ०७६÷०७७ मा ५४७, ०७७÷०७८ मा ६७८ र ०७८÷०७९ मा ५७७ घटना भएका छन् । सङ्गठित तथा आर्थिक अपराध अन्तर्गत एक हजार ४६१ वटा घटना भएका छन् । जसमा २०७४÷०७५ मा १८४, ०७५÷०७६ मा २१६, ०७६÷०७७ मा २५४, ०७७÷०७८ मा ३७१ र ०७८÷०७९ मा ४३६ घटना भएका छन् ।

डाँका चोरी अन्तर्गत ५ वर्षमा ७३७ वटा घटना भएको छन् । जसमा ०७४÷०७५ मा ७८, ०७५÷०७६ मा १७२, ०७६÷०७७ मा १५६, ०७७÷०७८ मा १५४ र ०७८÷०७९ मा १७७ घटना भएको तथ्यांक छ । यस्तै सामाजिक अपराधमा जम्मा ३ हजार ४६५ वटा घटना भएका छन् । जसमध्ये ०७४÷०७५ मा ५४७, ०७५÷०७६ मा ६३२, ०७६÷०७७ मा ८५३, ०७७÷०७८ मा ६१७ र ०७८÷०७९ मा ७८९ घटना भएका छन् ।

महिला बालबालिका तथा ज्येष्ठ नागरिकविरुद्ध अपराध अन्तर्गत १ हजार ८८७ घटना भएका छन् । जसमध्ये ०७४÷०७५ मा २३८, ०७५÷०७६ मा ३७३, ०७६÷०७७ मा ३५९, ०७७÷०७८ मा ४८३ र ०७८÷०७९ मा ४३४ घटना भएका छन् ।

यस्तै, सवारी दुर्घटना अन्तर्गत ५ वर्षमा ७८५, विविध घटना अन्तर्गत १५५ र अन्य घटना अपराधिक घटना अन्तर्गत १३५ घटना भएको तथ्यांक छ । समग्र वर्षको हिसावले ०७४÷०७५ मा २ हजार १३०, ०७५÷०७६ मा २ हजार ५६२, ०७६÷०७७ मा २ हजार ८८०, ०७७÷०७८ मा ३ हजार १४१ र ०७८÷०७९ मा ३ हजार २२८ घटना भएका छन् ।

सामाजिक सञ्जालको बढ्दो दुरुप्रयोगलगायतका कारण अपराधका घटनामा वृद्वि आएको नागरिकको बुझाई छ । धनगढी उपमहानगरपालिका वडा नम्बर २ का स्थानीय प्रयागराज जोशीले बढ्दो जनसंख्यासंगै सामाजिक सञ्जालको दुरुपयोगलगायतका कारण अपराधिक क्रियाकलाप बढ्दै गइरहेको बताए । ‘सामाजिक सञ्जाललाई व्यवस्थित बनाउन एउटा नियम कानुन बनाउन अतिनै आवश्यक छ,’ उनले भने, ‘यसमा प्रहरीको सक्रियता पनि त्यत्तिकै जरुरी छ ।’

प्रहरीको सक्रियता बजारमुखी भन्दा ग्रामिण क्षेत्रतिर पनि हुन आवश्यक रहेको उनको भनाइ छ । ‘समाजमा नयाँ मान्छे आउँदा समाजले वाच गर्न जरुरी रहेको देखिन्छ,’ उनले भने, ‘अब त घर भाडामा बस्ने मानिसरहरुलाई पनि परिचय खुल्ने कागजात लिएर मात्रै भाडामा बसाउनुपर्छ ।’

सुदूरपश्चिम प्रदेश प्रहरी कार्यालयका प्रवक्ता एवं वरिष्ठ प्रहरी उपरीक्षक भोलाबहादुर रावलले जनसंख्या बढ्नु, अशिक्षा, आर्थिक कारणलगायतले गर्दा नै अपराधका घटनामा वृद्धि भएको बताए । नेपाल प्रहरीले सामुदायिक प्रहरी साझेदारी कार्यक्रम अन्तर्गत विभिन्न कार्यक्रमहरू गर्दै आएको उनले बताए । उनका अनुसार अपराधका घटनामा १८ देखि ४० वर्ष उमेर समूहका मानिसहरू बढी संलग्न भएको पाइएको छ ।