धनगढी- कैलालीको धनगढी उपमहानगरपालिका र गोदावरी नगरपालिकामा गैह्र परम्परागत क्षेत्रमा महिला उद्यमशीलताको विकास परियोजना सञ्चालन हुने भएको छ । मुक्त कमैया महिला विकास मञ्चले सञ्चालन गर्ने सो परियोजनाको शुक्रबार एक कार्यक्रमबाबीच धनगढीमा शुभारम्भ गरिएको छ ।
कार्यक्रमा बोल्दै धनगढी उपमहानगरपालिकाका उपप्रमुख कन्दकलाकुमारी रानाले परियोजनाले व्यवसाय गर्न चाहाने विपन्न महिलालाई सहयोग पुग्ने विश्वास व्यक्त गरिन । साथै उनले कार्यक्रम सफलताको शुभकामना व्यक्त गरिन ।
कार्यक्रमका बारेमा जानकारी दिँदै मञ्चका कार्यक्रम संयोजक इन्द्र चौधरीले आर्थिकरुपमा विपन्न,व्यवसाय गर्न चाहाने महिला तथा युवाहरुलाई उद्यमी बनाउने परियोजनाको उदेश्य रहेको बताए । उनले भने ‘यस अघि मञ्चले कमैया,कम्लरीका क्षेत्रमा काम गर्दै आएको थियो । अबका दिनमा सबै समुदाय क्षेत्रमा परियोजनाले काम गर्ने छ । दुबै पालिकामा एक सय २० जना उद्यमी बनाउने हाम्रो उदेश्य छ ।’
महिलालाई पुरुष सरह काम गर्न उत्प्रेरित गर्ने,महिलाहरुलाई परम्परागत कामबाट बाहिर ल्याएर आधुनिक किसिमको उद्यमशीलतामा ल्याइने बताउँदै महिलालाई आधुनिक व्यवसाय तथा बजारसँग जोडेर आर्थिक गतिविधिमा सकृय बनाइने उनले बताए । उनले भने ‘यो परियोजना बढी महिला लक्षित छ । ८० प्रतिशत महिला र २० प्रतिशत पुरुष उद्यमी बनाउने हाम्रो उदेश्य हो ।’
उनले उद्यमी बन्न इच्छुकलाई सीपमुलक तालिम,उपकरण तथा आर्थिक सहयोग समेत गरिने बताए । उनले भने ‘हामीले सहयोग त गर्छौ तर अनिवार्य व्यवसाय गर्नुपर्ने हुन्छ ।’ १८ वर्ष देखि ४० वर्ष उमेर समूह भित्रकालाई उद्यमीका लागि छनोट गरिने तथा पालिकामा समिति गठन गरेर उद्यमी छनोट गरिने चौधरीले बताए ।
एफसिएको आर्थिक सहयोगमा कार्यक्रम सन् २०२६ सम्म सञ्चालन गरिने तथा पहिलो वर्ष प्रति पालिका ३१ लाख ८९ हजार पाँच सय ३० रुपैयाँ बजेट रहेको जनाइएको छ । मञ्चका अध्यक्ष सीमाकुमारी चौधरीको अध्यक्षतामा भएको कार्यक्रम सञ्चालन मञ्चमा कार्यरत पदमराज जोशीले गरेका थिए । कार्यक्रममा धनगढी उपमहानगरपालिकाका विभिन्न वडाका वडाध्यक्ष लगायतका जनप्रतिनिधि एवं सरोकारवालाहरुको सहभागिता रहेको थियो ।
